Дзеля забеспячэння перавозак пасажыраў

Чарговая “прамая тэлефонная лінія”, праве-дзеная на базе рэдакцыі сумесна з аддзелам ідэалагічнай работы райвыканкама, была прсвечана пытанням ажыццяўлення пасажырскіх перавозак транспартам аўтапарка №14, аддзела адукацыі райвыканкама, індывідуальнымі прадпрымальнікамі, і захавання правілаў бяспекі дарожнага руху пры перавозцы пасажыраў. У “прамой лініі” прымалі ўдзел: дырэктар Кіраўскага філіяла “Аўтапарк №14” ААТ “Магілёўаблаўтатранс” І.А.Глазкоў, начальнік аддзела адукацыі райвыканкама Н.І.Шапавалава, начальнік аддзела падаткаабкладання фізічных асоб раённай падатковай інспекцыі І.А.Каранкевіч, начальнік аддзялення ДАІ РАУС В.М.Кузьменка.
— У вёсках Дабрыца і Асаўнік пражываюць у асноўным састарэлыя людзі. Канчатковы прыпынак аўтобуса з Даброціна, які тройчы на тыдні курсіруе праз нашы населеныя пункты, — Кіраўск. Многія вяскоўцы часам едуць да Бабруйска. Таму ім даводзіцца рабіць перасадку ў Кіраўску, што вельмі нязручна. Ці магчыма прадоўжыць маршрут да Бабруйска хаця б у нядзелю?
І.А.Глазкоў:

— Паспрабуем вырашыць гэта пытанне. Хаця маршрут Даброціна-Кіраўск за 11 месяцаў г.г. прынёс аўтапарку 24 мільёны рублёў страт.
— Вельмі зручна стала дабірацца ў патрэбнае месца, выкарыстоўваючы паслугі мясцовага таксі. Цікава, якім чынам індывідуальныя прадпрымальнікі ўстанаўліваюць плату за праезд?
І.А.Каранкевіч:

— Тарыфы на праезд зацверджаны ўпраўленнем па цэнах аблвыканкама, у кожным таксі маецца таксометр. Адзін кіламетр паездкі каштуе 1500 рублёў, а кіламетраж аплачваецца згодна паказчыка таксометра. Каб не было парушэнняў у аплаце за праезд, Правілаў дарожнага руху, сумесна з супрацоўнікамі АДАІ, транспартнай міліцыі робім кантрольныя праверкі.
— Ці можна задаволіць просьбу пасажыраў, якім неабходна дабірацца да в.Кострыцкая Слабодка, каб аўтобус па маршруце Бабруйск-Казулічы падвозіў іх крыху бліжэй да вёскі?
І.А.Глазкоў:

— Любое адхіленне аўтобуса ад маршрута з’яўляецца парушэннем устаноўленых правілаў. Каб атрымаць дазвол на працяг маршрута, гэту прапанову неабходна ўзгадняць з рознымі службамі. Будзем займацца вырашэннем гэтага пытання.
— Ці ўсе дзеці, якія пражываюць у сельскіх населеных пунктах, забяспечаны бясплатным падвозам ва ўстановы адукацыі?
Н.І.Шапавалава:

— Бясплатным падвозам на транспарце, які знаходзіцца на балансе агульнаадукацыйных устаноў, і на аўтобусах прыгараднага злучэння забяспечаны ўсе 410 вучняў з 15 сельскіх школ раёна.
— Якія меры прымяняюцца да нелегальных перавозчыкаў пасажыраў?
І.А.Каранкевіч:

— У выпадку ажыццяўлення прадпрымальніцкай дзейнасці без дзяржаўнай рэгістрацыі і без ліцэнзіі на парушальнікаў накладаецца штраф у памеры да 100 базавых велічынь з канфіскацыяй транспартнага сродка. Супрацоўнікамі раённай падатковай інспекцыі выяўляліся выпадкі незаконнага перавозу пасажыраў, на парушальнікаў былі накладзены штрафы.
— Ці магчымы падвоз дзяцей у дашкольныя ўстановы?
Н.І.Шапавалава:

— У Кодэксе Рэспублікі Беларусь аб адукацыі, які ўступіць у сілу з 1 верасня 2011 года, запісана, што падвоз дзяцей ва ўстановы дашкольнай адукацыі (у выпадку непрадастаўлення месца ў дзіцячым садку па месцы жыхарства) пры адсутнасці аўтамабільных перавозак пасажыраў транспартам агульнага карыстання будзе арганізоўвацца мясцовымі органамі ўлады.
На «прамой лініі» дзяжурыла Таццяна БАРАДЗІНА.

Добавить комментарий

Ваш адрес email не будет опубликован.