Жаночыя разборкі…

У апошні час у аператыўных зводках усё часцей фігуруюць прадстаўніцы цудоўнай паловы чалавецтва. Дзёрзкія жаночыя разборкі з трагічнымі фіналамі нібы становяцца моднымі. Маладыя дзяўчыны і жанчыны ва ўзросце забываюцца аб сваім прыродным прызначэнні — быць пяшчотнымі, клапатлівымі прадстаўніцамі слабай паловы чалавецтва…
Завадатаркай чарговай жаночай разборкі стала 23-гадовая жыхарка аграгарадка Скрыпліца. У адзін з вечароў сёлетняга студзеня ў ходзе сумеснага распіцця спіртнога яна параніла кухонным нажом другую жанчыну. На шчасце для абедзвюх раны адносяцца да катэгорыі лёгкіх, якія пацягнулі за сабой кароткачасовае расстройства здароўя. Як ні жудасна гэта гучыць, магчыма, вынік разборкі атрымаўся лёгкім з-за таго, што абедзве былі ў стане моцнага алкагольнага ап’янення.
Сваімі дзеяннямі 23-гадовая грамадзянка ўчыніла злачынства, прадугледжанае арт.153 Крымінальнага Кодэкса Рэспублікі Беларусь “Наўмыснае прычыненне лёгкага цялеснага пашкоджання”. Сваю віну яна поўнасцю прызнала і нават раскайваецца ва ўчыненым, аднак растлумачыць, чаму пайшла на такі крок, так і не змагла…
З паказанняў віноўнай: “…У той дзень з самай раніцы разам з сяброўкай у Баравіцы я ўжывала спіртное. Потым пайшла да знаёмага, дзе вырашыла крыху паспаць. Там мяне разбудзіла яшчэ адна сяброўка і прапанавала дапамагчы ёй прадаць гармонік. Разам мы зайшлі да знаёмага і яго сужыцельнікі — пацярпеўшай. Усёй кампаніяй выпівалі. У ходзе гутаркі, мабыць па той прычыне, што я моцна ап’янела, пацярпеўшая стала мяне раздражняць. Я сказала, каб яна ішла спаць, бо парэжу яе. Тая пайшла ў пакой, упала на падлогу ля ложка і не магла падняцца. Я падняла яе, паклала на ложак і паўтарыла, што калі яна не «укладзецца», то парэжу. Мне падалося, што пацярпеўшая не паверыла маім словам. Я пайшла ў залу, дзе са стала ўзяла нож. Такім чынам хацела напужаць жанчыну…”.
Калі трэцяя сабутэльніца ўбачыла, што адбываецца, сказала, што выклікае “міліцыю”. Злачынца спужалася пакарання і паспрабавала ўцякчы, але змагла дабегчы толькі да суседняга дома, упала ў сумёт і з-за таго, што была вельмі п’яная, не змагла падняцца. Там яе і арыштавалі супрацоўнікі РАУС.
У працэсе даследавання гэтай крымінальнай справы адзіны “джэнтльмен”, які знаходзіўся ў жаночай кампаніі, паказаў: “…У выпадку, калі б я заўважыў, што маёй сужыцельцы наносяць удары нажом, я б уступіўся за яе і папярэдзіў бы злачынства, аднак на той момант знаходзіўся ў стане моцнага алкагольнага ап’янення і не бачыў, што робяць жанчыны”.
Да ведама чытачоў, згодна дзеючага заканадаўства, за нанясенне наўмыснага лёгкага цялеснага пашкоджання прадугледжана пакаранне ў выглядзе грамадскіх работ, альбо штрафу, альбо папраўчых работ на тэрмін да аднаго года, альбо арышту на тэрмін да трох месяцаў.
Аляксандр ПАТАПЕНКА,
намеснік
начальніка РАУС.

Добавить комментарий

Ваш адрес email не будет опубликован.