Надыход вясны ўсё больш адчувальны, і для аграрыяў усё бліжэй той час, калі будзе дадзены старт пасяўной кампаніі. Да гэтага адказнага перыяду земляробы рыхтаваліся загадзя, каб правесці палявыя работы на належным узроўні.
Аб мерах падрыхтоўкі сельгасарганізацый раёна да палявых работ, стварэнні трывалай кармавой базы і ўборцы ўраджаю ў бягучым годзе — гэтае пытанне было ў ліку асноўных на парадку дня выязнога пасяджэння райвыканкама, якое прайшло 7 сакавіка на базе АСП ААТ “Бабруйскаграмаш” СВК “Бераснёўскі”. На прыкладзе гэтай гаспадаркі былі абмеркаваны ўсе нюансы падрыхтоўкі да веснавой сяўбы ў цэлым па раёне: пытанні своечасовай і якаснай падрыхтоўкі трактароў, абсталявання, іншай сельгастэхнікі, задзейнічанай на веснавых палявых работах, забяспечанасці насеннным пасяўным матэрыялам, мінеральнымі і арганічнымі ўгнаеннямі, стварэння належных умоў працы і бытавых умоў для механізатараў і іншыя.
На мехдвары сельгасарганізацыі ўдзельнікі пасяджэння агледзелі тэхніку, якая была вы-стаўлена на лінейку гатоўнасці ў парадку чарговасці яе выкарыстання. Каментарыі даваў начальнік аддзела інтэнсіфікацыі райсельгасхарчу Іван Пігулеўскі. Ён прааналізаваў стан гатоўнасці сельгастэхнікі да палявых работ у гаспадарках раёна на гэты дзень, спыніўшыся на тых, дзе энерганасычаная тэхніка, пасяўныя агрэгаты яшчэ ў рамонце. Пытанне своечасовага яго завяршэння старшыня райвыканкама Уладзімір Піскіжаў даручыў узяць пад асаблівы кантроль і сканцэнтраваў увагу прысутных кіраўнікоў сельгасарганізацый на тым, што тэхніка, якая будзе задзейнічана на веснавых палявых работах, павінна быць пастаўлена на лінейку гатоўнасці не пазней 15 сакавіка. З 14 па 16 сакавіка ў гаспадарках праводзяцца ўзаемаправеркі.
У ходзе абмеркавання пытання было прынята рашэнне на базе райаграпрамтэхзабеспячэння стварыць да пачатку сяўбы страхавы фонд найбольш запатрабаваных запчастак, для іх набыцця сельгасарганізацыямі будуць пералічаны сродкі згодна наяўных пасяўных плошчаў.
Як адзначыў першы намеснік начальніка райсельгасхарчу Мікалай Пад’ялоўскі, у гаспадарках раёна пад поўную патрэбу падрыхтавана насенне яравых збожжавых, зернебабовых культур, шматгадовых траў, ільну. Усё насенне кандыцыйнае і адпавядае пасяўному стандарту.
Увага была нададзена пытанню забяспечанасці мінеральнымі ўгнаеннямі. Згодна рашэння райвыканкама, райсельгасхарчу і сельгасарганізацыям неабходна прыняць меры па нарыхтоўцы пад яравую сяўбу ў гэтым годзе 10,6 тыс. тон дзеючага рэчыва мінеральных угнаенняў, у тым ліку 4,5 тыс.т азотных, 1,7 тыс. т фосфарных і 4,4 тыс. т калійных угнаенняў. Згодна рабочага плана іх унясенне павінна быць праведзена за 14 дзён — неабходнай тэхнікі для гэтага хапае.
Што датычыцца арганікі, яе прадугледжана планам унесці 267 тыс. тон, але, як адзначыў Мікалай Пад’ялоўскі, мяркуецца ўнесці каля 360 тыс. тон — практычна ўсе арганічныя ўгнаенні вывезены на палі.
Для забеспячэння планавай ураджайнасці па збожжаваму кліну ў 50 ц/га і атрымання намалоту ў 91 тыс. тон, падкрэсліў старшыня райвыканкама, неабходна зрабіць запраўку ўгнаеннямі пад патрэбу.
Немалаважная справа — і ўнясенне на ўсіх вызначаных пасяўных плошчах гліфасатутрымліваючых прэпаратаў.
У адпаведнасці з рашэннем райвыканкама ўпраўленню сельскай гаспадаркі і харчавання неабходна забяспечыць у 2012 годзе правядзенне ўсяго комплексу арганізацыйна-тэхналагічных мерапрыемстваў, накіраваных на выкананне даведзеных на бягучы год аб’ёмаў вытворчасці асноўных відаў сельскагаспадарчай прадукцыі.
Вытворчасць у сельгасарганізацыях усіх відаў кармоў (уключаючы летнія зялёныя) ў разліку на адну ўмоўную галаву жывёлы павінна быць забяспечана ў аб’ёме не менш 37,6 ц к/адз., нарыхтоўка кармоў на стойлавае ўтрыманне — не менш 50,6 ц.к.адз. За кошт строгага захавання тэхналогіі нарыхтоўкі кармоў удзельная вага травяністых кармоў першага класа павінна скласці не менш 90% ад аб’ёму нарыхтоўкі.
Наступныя задачы, пастаўленыя перад райсельгасхарчам, — забяспечыць нарыхтоўку сельгасарганізацыямі раёна фуражнага збожжа ў агульным аб’ёме 35200 т; удасканаленне структуры пасяўных плошчаў сельгаскультур; стварэнне страхавых фондаў сартавога насення збожжавых і зернебабовых культур ураджаю 2012 года ў агульным аб’ёме 320 тон; правядзенне падсеву шматгадовых траў, залужэння і перазалужэння лугавых угоддзяў, у тым ліку закладкі доўгагадовых культурных пашаў і сяўбы па-жніўных і прамежкавых культур у сельгасарганізацыях у вызначаных аб’ёмах; правядзенне закладкі насеннікаў шматгадовых траў на пло-шчы 960 га, у тым ліку бяспокрыўна злакавых траў — 510 га. Усе ўказаныя аб’ёмы вызначаны канкрэтна па кожнай гаспадарцы.
Тэхніка, задзейнічаная на нарыхтоўцы кармоў, павінна быць на лінейцы гатоўнасці не пазней 10 мая, на ўборцы збожжавых і зернебабовых культур — да 15 ліпеня 2012 г.