Аб праблеме бадзяжных сабак
У рэдакцыю раённай газеты звярнуўся кіраўчанін У.А.Халенка наконт праблемы, якая хвалюе не толькі яго аднаго, — наяўнасці ў нашым горадзе вялікай колькасці бадзяжных сабак і неабходнасці прыняцця экстраных мераў па забеспячэнні бяспекі насельніцтва ў цёмны час сутак.
Заяўнік, перш чым звярнуцца ў “раёнку”, наведаўся ва УКП “Жылкамгас”, дзе далі адказ, што гэтым пытаннем займаецца ветлячэбніца. Там У.А.Халенку накіравалі зноў-такі ў камунальную службу…
«Дык хто ж павінен займацца вырашэннем праблемы з бадзяжнымі сабакамі, і калі яна перастане непакоіць кіраўчан?» — на гэтае пытанне У.А.Халенка папрасіў даць адказ па старонках раённай газеты.
Дырэктар УКП “Жылкамгас” Юрый Мацюшонак пракаменціраваў гэтую сітуацыю так: “Рашэннем праблемы з бадзяжнымі сабакамі на тэрыторыі г.Кіраўска займаецца наша прадпрыемства. Гэтая работа праводзіцца рэгулярна і будзе працягнута”.
Ёсць і іншы бок справы — адносіны да сабак іх гаспадароў. Нярэдка яны зусім не ўсведамляюць, што адказныя за тых, каго прыручылі. І літаральна вы- кідаюць на вуліцу бадзяжнічаць сваіх чацвераногіх пітомцаў. Такі факт бачыў і У.А.Халенка: на адной з вуліц горада спынілася машына, і адтуль быў выпіхнуты сабака, а аўтамабіль паехаў далей…
У бліжэйшых нумарах рэдакцыя “Кіраўца” мае намер яшчэ раз узняць праблему безнаглядных сабак з розных пунктаў гледжання і паспрабаваць высветліць, якім чынам яна ўзнікла? Калі у вас, паважаныя чытачы, ёсць меркаванні наконт заяўленай тэмы, калі ласка, звяртайцеся!