На радасць дзецям і дарослым!

Зараз, калі ўсталяваліся маразы, асаблівы акцэнт ва ўстановах адукацыі раёна робіцца на зімовыя віды спорту: катанне на лыжах, каньках.
Галоўнае — жаданне і ініцыятыва. Дзякуючы гэтым якасцям кіраўніцтва і педкалектыву Паўлавіцкай СШ тут побач з будынкам школы з’явіўся каток. Асабліва пастараліся настаўнік працоўнага навучання Юрый Макаронак і настаўнік фізічнага выхавання Валерый Вароніч, — людзі неабыякавыя, хварэючыя душой за даручаную ім справу. Цяпер вучні школы, выкарыстоўваючы кожную свабодную хвілінку,у тым ліку і вялікі перапынак, з захапленнем бавяць час на лёдзе. Радасці школьнікаў няма межаў! Дзяўчынкі, нібы сапраўдныя фігурысткі, “выпісваюць” складаныя фігуры, а хлопцы ўсур’ёз захапіліся хакеем.
На ўроках працоўнага навучання рабяты пад кіраўніцтвам свайго настаўніка зрабілі хакейныя вароты, клюшкі. І ўжо створана свая хакейная каманда, наладжаны трэніроўкі. Пасля ўрокаў школьнікі гуртам збіраюцца на катку, нават нягледзячы на тое, што дома засталіся камп’ютарныя гульні і інтэрнэт.
Як прызнаюцца самі рабяты, многія з іх да гэтага часу ніколі не станавіліся на канькі. Але, па тым, як шпарка рассякаюць яны на каньках лёд, такога нават не скажаш! Па меркаванні рабят навучыцца катацца на каньках зусім нескладана, галоўнае, — зрабіць першы крок на лёдзе.
Існаванне катка ўнесла разнастайнасць не толькі ў школьнае жыццё. Дарослыя таксама з ахвотай выходзяць на лёд. Прыходзяць на каток бацькі вучняў, выпускнікі, жыхары аграгарадка і увогуле ўсе жадаючыя.
Канькі Паўлавіцкая СШ бярэ напракат у комплексна-прыёмным пункце “Барсукі” УКП “Бытпаслугі”. Прыёмшчыца Наталля Хрусталёва заўсёды ідзе насустрач пажаданням школы, за што і кіраўніцтва, і вучні ёй вельмі ўдзячныя.
Кацярына КІРЭЕВА.
Фота
Максіма МІКЕШЫНА.

Добавить комментарий

Ваш адрес email не будет опубликован.