У Жылічах прайшлі занальныя спаборніцтвы па міні-футболе сярод дзяўчат у праграме абласной круглагадовай Спартакіяды школьнікаў. Удала выступіла зборная каманда Кіраўскага раёна пад кіраўніцтвам Кірыла Сцерлінгава. Адметна, што ў яе саставе выключна сельскія дзяўчаты — са Скрыпліцы, Баравіцы і Барчыц. Толькі другі год яны трэніруюцца, а паказваюць ужо дастойную гульню і адпаведна высокія рэзультаты. Летась каманда прабілася ў фінальную частку, дзе заняла 5-е месца. Сёлета ў кіраўчанак больш высокія задачы: як мінімум, увайсці ў тройку прызёраў. І, зыходзячы з апошніх гульняў у Жылічах, камандзе гэта па сілах.
Ужо ў першым паядынку, гуляючы натхнёна і мэтанакіравана, кіраўчанкі “расклалі на лапаткі” каманду з Глуска – 7:0. Потым былі сінхронныя перамогі над Асіповіцкім (6:4), Клічаўскім (3:2) і Бабруйскім (5:0) раёнамі. І толькі ў апошняй сустрэчы з футбалісткамі Бабруйска нашы дзяўчаты мінімальна ўступілі з лікам 1:2, даказаўшы пры гэтым, што і гараджанкі ім “па зубах”. У нашай камандзе можна асобна вылучыць бамбардзірскія якасці Алесі Прыгажаевай, якая забіла 9 галоў. Надзейна стаяла ў варотах Вераніка Няфёдава, і выдатна згуляла ўся каманда.
Ужо зусім хутка нашым дзяўчатам прадстаяць матчы ў фінальным турніры ў Магілёве, куды яны прайшлі разам з бабруйчанкамі. Магчыма, там можа адбыцца і матч-рэванш…
Аляксандр ХАХЛОЎ,
намеснік дырэктара ДЮСШ.