Дастойная перамога кіраўчанак

voley

Напярэдадні навагодніх святаў на базе “Школы алімпійскага рэзерву валейбольнага клуба “Мінск” адбыўся турнір па валейболе сярод дзяўчат узроставай катэгорыі 1998-99 г.н. Удзел у турніры прыняло 7 каманд, у тым ліку і прадстаўніцы нашага раёна.
Па словах старшага трэнера аддзялення валейбола ДЮСШ Сяргея Лазаковіча, амаль усе каманды згулялі на дастойным узроўні, паказаўшы добрую фізічную падрыхтоўку.
Валейбалісткі Кіраўскай ДЮСШ у напружанай барацьбе ўсё ж змаглі заваяваць 4 перамогі: з лікам 3:0 яны выйгралі ў дзвюх каманд Мінскага валейбольнага клуба, спартыўнай школы алімпійскага рэзерву “Вікторыя” г.Масквы і ў каманды з г.Шклова.
Але, як і ў любым спаборніцтве, разам з перамогамі здараюцца і крыўдныя паражэнні, ад якіх нікуды не дзецца. Прадстаўніцы нашай валейбольнай каманды з лікам 2:3 прайгралі камандзе Санкт-Пецярбурга “Спартыўны экран”. З такім жа лікам перамогу над нашай камандай святкавалі  мінчанкі.
У агульным жа заліку кіраўчанкі набралі 14 ачкоў, што дазволіла ім заняць ганаровае першае месца! Валейбалісткі з Санкт-Пецярбурга сталі другімі, а прадстаўніцы г.Мінска — трэцімі.
За сваю перамогу нашы дзяўчаты атрымалі Кубак і медалі, а капітан каманды Крысціна Ермалаева была прызнана лепшым іграком зборнай, за што атрымала памятны сувенір.
Яскравая і дастойная гульня прадстаўніц Кіраўшчыны дазволіла нашай валейбольнай камандзе атрымаць запрашэнне на міжнародны турнір, які пройдзе ў сакавіку бягучага года ў Маскве.
Увогуле 2013 год быў для нашых валейбалістак і іх трэнера багатым на поспехі і перамогі. Так трымаць!
Анастасія БЕГУНОВІЧ.

Добавить комментарий

Ваш адрес email не будет опубликован.