«Дзякуй за Перамогу!»

maniko

Здаецца, з аднаго боку, з кожным годам усё ярчэй свеціць сонца, цвітуць кветкі, весялей гучыць дзіцячы смех, бо ўсё слабей чуваць адгалоскі самай страшнай у гісторыі чалавецтва вайны. З другога боку, сумна ўсведамляць, што ўсё менш і менш становіцца не толькі ўдзельнікаў Вялікай Айчыннай вайны, але і сведкаў тых жудасных падзей. Толькі ніякі час не залечыць раны зямлі беларускай, не верне загубленае дзяцінства людзям старэйшага пакалення, пакалечаную маладосць. Мы не можам, не маем права забываць загінуўшых у гады ваеннага ліхалецця і тых, каму пашчасціла выжыць у полымі той страшнай вайны. Наша ўдзячнасць ім будзе вечнай…
З мэтай развіцця актыўнай грамадзянскай пазіцыі, патрыятычнага выхавання вучняў у гімназіі распрацаваны план правядзення мерапрыемстваў па святкаванні Дня Перамогі і да 70-годдзя вызвалення Беларусі ад нямецка-фашысцкіх захопнікаў. Настаўнікі імкнуцца не проста даць сваім выхаванцам інфармацыю аб падзеях Вялікай Айчыннай вайны, а напоўніць яе канкрэтнымі фактамі, звязаць з сучаснасцю. Традыцыйнымі для гімназістаў сталі акцыі “Жыві і помні”, “Ветэран жыве побач”, у ходзе рэалізацыі якіх рабяты добраўпарадкоўваюць месцы воінскіх пахаванняў, наведваюць ветэранаў Вялікай Айчыннай вайны і працы, аказваюць ім пасільную дапамогу, віншуюць са святамі. Галоўнае, што патрэбна сёння гэтым людзям, — увага і клопат, а падрастаючаму пакаленню — іх жыццёвая мудрасць. Ветэраны з’яўляюцца для рабят прыкладам мужнасці, стойкасці, любові да Радзімы і свайго народа.
У гімназіі распрацаваны маршруты экскурсій да памятнага знака, устаноўленага ў гонар 60-годдзя вызвалення раёна ад нямецка-фашысцкіх захопнікаў, брацкай магілы савецкіх воінаў, партызан і ахвяр фашызму па вуліцы Гагарына, брацкай магілы савецкіх воінаў па вуліцы Арлоўскага. У класах праводзяцца тэматычныя класныя і інфармацыйныя гадзіны. У бібліятэцы арганізаваны літаратурныя выставы “Няхай пакаленні памятаюць”, “Украдзенае дзяцінства”, праводзяцца экспрэс-хвіліны па старонках газет і часопісаў “Дарогамі вайны”.
Гімназісты прынялі актыўны ўдзел у раённым конкурсе дзіцячай творчасці “Памяць сэрца”, па выніках якога ў намінацыі “Чытальнікі” вучаніца 9 “А” класа Любоў Чайка стала ўладальніцай гранпры, а вучаніца 10 класа Валерыя Петрушкова атрымала дыплом першай ступені. Дыпломам першай ступені ўзнагароджана і вучаніца 9 “В” класа Улада Харлінская ў намінацыі “Вакальная творчасць”. Напярэдадні Дня Перамогі гімназісты прымаюць у гасцях дарагіх ветэранаў, для якіх падрыхтавалі святочны канцэрт і сувеніры.
Галіна РУСЕЦКАЯ,
намеснік дырэктара гімназіі
па вучэбнай рабоце.

Добавить комментарий

Ваш адрес email не будет опубликован.