Эстафета працягваецца
В елапрабег у межах акцыі “За здароўем — на веласіпедзе!”, прысвечаны 70-годдзю вызвалення Рэспублікі Беларусь ад нямецка-фашысцкіх захопнікаў, з перадачай эстафеты Агню Славы і памяці герояў працягваўся ў а/г Любонічы.
Каля Любоніцкай СШ сабралася шмат моладзі і людзей сталага ўзросту. Пераважная большасць прыйшла на свята са сваімі двухколавымі сябрамі — веласіпедамі, каб прыняць удзел у велапрабегу.
Лампаду з Агнём Славы і памяці герояў прыняла ад дэлегацыі а/г Баравіца старшыня Любо-ніцкага сельвыканкама Таццяна Вербінава. У сваёй прамове яна заклікала моладзь свята шанаваць памяць загінуўшых на вайне герояў, быць дастойнымі прадаўжальнікамі традыцый сваіх дзедаў і прадзедаў.
Удзельнікі мастацкай самадзейнасці мясцовага СДК падрыхтавалі канцэртную праграму.
Далей быў дадзены старт велапрабегу. Са спартыўным азартам пераадолелі дыстанцыю школьнікі, настаўнікі, работнікі розных арганізацый. У той час, як яны імчалі па вуліцах аграгарадка, астатніх радавалі музычнымі падарункамі вучні Любоніцкай СШ Іна Чайка, Віка Літвінчык, а таксама аўтар гэтых радкоў і музычны кіраўнік СДК Ніна Шчоткіна.
Пасля фінішу велапрабегу ўсе дружна, з выдатным настроем накірава-ліся на стадыён запускаць паветраных змеяў, прадэманстраваўшы тым самым, што ўсім патрэбна мірнае неба над галавой.
Наступным населеным пунктам, якому будзе перададзена эстафета Агню Славы і памяці герояў, стане в.Чыгірынка.
Надзея ПІНЧУК,
дырэктар
Любоніцкага СДК.