І зноў Чыгірынка, рыбалка і маса станоўчых эмоцый!

rassvetovcy

І зноў Чыгірынскае вадасховішча паклікала на свае прасторы гарачых прыхільнікаў рыбалкі: у мінулую суботу тут адбыліся стаўшыя ўжо традыцыйнымі раённыя спаборніцтвы па лоўлі рыбы на паплавочную вуду і паралельна — абласны фестываль “Аматар Masters-2”.
Рыбалоўна-турыстычная жамчужына нашага раёна ў любую пару года і ў любое надвор’е прыцягвае ўвагу і рыбаловаў-спартсменаў, і аматараў — усіх, для каго рыбалка — не проста захапленне, а лад жыцця. Для многіх важны не столькі ўлоў, колькі адчуванне азарту, калі яго чакаеш, магчымасць яднання з прыродай, дзе можна адпачыць і душой, і целам. Рыбалцы “все возрасты покорны”, і моцны пол, і слабы…

Падчас урачыстага адкрыцця абласнога фестывалю і раённых спаборніцтваў ганаровае права ўзняць Дзяржаўны флаг Рэспублікі Беларусь было прадастаўлена пераможцу фестывалю “Аматар Masters-1” Аляксандру Півавараву і пераможцу раённых спаборніцтваў па лоўлі рыбы на паплавочную вуду 2013 года Анатолю Гаўрылаву.
Да ўдзельнікаў звярнуўся старшыня райвыканкама Уладзімір Піскіжаў. Ён адзначыў, што рады вітаць прысутных і як кіраўнік рэгіёна, і як рыбалоў-аматар. Такія спаборніцтвы праходзяць на тэрыторыі раёна не першы год у розных фарматах і ў розную пару года, і заўсёды Кіраўшчына прымае гасцей са шчырым жаданнем, каб яны адчувалі сябе ўтульна, камфортна і каб пасля ад’езду ў іх засталіся самыя добрыя ўражанні і ўспаміны.
Уладзімір Уладзіміравіч падкрэсліў, што рыбалка — гэта не толькі спорт, захапленне, але яшчэ і від сямейнага адпачынку, які становіцца ўсё больш папулярным у нашай краіне; гэта прапаганда здаровага ладу жыцця і разумных, рацыянальных адносін да нашых прыродных багаццяў і рыбных запасаў, бо ніводны сапраўдны рыбак не перавышае норм лоўлі, а рыбаловы-спартсмены ўвогуле адпускаюць рыбу ў вадаём.
На спаборніцтвах за майстэрствам спартсменаў, аматараў, новымі прыёмамі і метадамі рыбнай лоўлі з цікавасцю назіраюць мясцовыя жыхары, моладзь. І ў Чыгірынцы, і ў раёне ёсць касцяк рыбаловаў, якія могуць даць фору прафесіяналам.
Намеснік старшыні ГА “Беларуская федэрацыя рыбалоўнага спорту” Канстанцін Ціханаў ад імя рыбаловаў-спартсменаў, федэрацыі рыбалоўнага спорту падзякаваў Кіраўскаму райвыканкаму і асабіста Уладзіміру Піскіжаву за разуменне пытанняў спартыўнай рыбалкі, аказваемую дапамогу ў арганізацыі спаборніцтваў.
На фестываль, спонсарам якога выступіў магазін рыбалоўных снасцей “Аматар”, акрамя магіляўчан, прыбылі іх аднадумцы з Мінскай і Гомельскай абласцей.
Прагучала традыцыйнае пажаданне: “Ні хваста, ні лускі!”, і ўдзельнікі спаборніцтваў накіраваліся праз дамбу Чыгірынскага вадасховішча ў сектары лоўлі.
Спякотнае надвор’е ніколькі не ўсыпіла пільнасці рыбы: мабыць, прайшоўшы выпрабаванне сучаснымі прыёмамі лоўлі, паспытаўшая новых прыкормак і пабачыўшая вялізную колькасць людзей, жадаючых яе злавіць, рыба стала разумнейшай і не жадала кляваць. Тры гадзіны, праведзеныя рыбаловамі-аматарамі з вудамі ля вады, не прынеслі надта адчувальных рэзультатаў, нават у вопытных майстроў. Але ўсё ж гэта былі спаборніцтвы, і судзейская калегія ўзважыла ўлоў, прадстаўлены і камандамі, і асобнымі ўдзельнікамі.
А потым адбылася цырымонія ўзнагароджвання лепшых. У камандным заліку першае і другое месцы занялі прадстаўнікі СВК “Рассвет” імя К.П.Арлоў-скага: адпаведна каманды ў саставе Анатоля Гаўрылава, Дзмітрыя Кадзякова і Генадзя Лагойкі, Сяргея Труханава. Трэцяе месца — на рахунку каманды ў саставе пракурора раёна Вячаслава Паршука і начальніка раённай інспекцыі па падатках і зборах Віктара Каранкевіча. Былі таксама заахвочаны ў намінацыях: “Самы малодшы рыбалоў” — Максім Рышкевіч (Скрыпліцкі сельсавет), “Самы старэйшы рыбалоў” — Віктар Мароз (Жыліцкі сельгаскаледж), “Рыбалоў, які злавіў самую буйную рыбіну” (а важыла яна 68 грамаў) — Аляксандр Каранкевіч (аўтапарк №14), “Рыбалоў, які злавіў самую дробную рыбіну” (6 грамаў) — Сяргей Карповіч (СВК “Калгас “Беларусь”).
Усе былі ўзнагароджаны дыпломамі райвыканкама і каштоўнымі прызамі.
Прыз ад ГА “Беларуская Федэрацыя рыбалоўнага спорту” і фестывалю “Аматар Masters-2” быў уручаны Анатолю Гаўрылаву, які не раз станавіўся лепшым на спаборніцтвах рыбаловаў-аматараў, і на гэтых таксама атрымаў самы важкі ўлоў.
Калі падводзіліся вынікі раённых спаборніцтваў, абласныя былі толькі ў самым разгары. Аб іх выніках можна бу-дзе даведацца на інтэрнет-партале “Могилевский Рыболов” www.bagor.net
Для мясцовых жыхароў і балельшчыкаў работнікі раённага Дома культуры правялі забаўляльную праграму, а побач працавала палатка райспажыўтаварыства, прапаноўваючы шашлыкі, марожанае, прахаладжальныя напіткі і іншае.
Удзельнікі спаборніцтваў развіталіся з Чыгірынкай, думаецца, не надоўга: абавязкова зноў прыедуць сюды парыбачыць — калі не на афіцыйныя спаборніцтвы, то проста для душы…
Наталля ХАДАКОВА.
Фота
Максіма МІКЕШЫНА.

изображения не найдены

Добавить комментарий

Ваш адрес email не будет опубликован.