Ручны масаж з’яўляецца эфектыўным метадам лячэння і прафілактыкі розных хвароб. Ён спрыяе паскарэнню працэсаў рэгенерацыі траўмаваных тканак, знімае балявыя адчуванні, ацёкі, аднаўляе сілу стомленай мышцы, павялічвае яе працаздольнасць, умацоўвае суставы і звязкі. А калі гэтую медыцынскую працэдуру робіць кваліфікаваны спецыяліст, аздараўленчы эфект павялічваецца ўдвая.

Гэтыя словы можна адрасаваць масажысту райбальніцы Мікалаю Акулічу. Нягледзячы на малады ўзрост — 25 мая ён адзначыў сваё 25-годдзе, Мікалай сваёй стараннай працай і кваліфікаванай дапамогай ужо заслужыў павагу калег і шматлікія словы ўдзячнасці ад пацыентаў. Сам ён мясцовы, нарадзіўся ў Кіраўску. Навучаўся ў Гродзенскім медыцынскім каледжы, дзе атрымаў спецыяльнасць масажыста. У 2010 годзе М.М. Акуліч прыйшоў на работу ў райбальніцу, дзе працуе яго маці Валянціна Уладзіміраўна.Усё сваё свядомае жыццё жанчына пры-свяціла медыцыне: у цяперашні час яна працуе медсястрой побач з сынам у фізіятэрапеўтычным аддзяленні райбальніцы.
Варта адзначыць, што ўсе, каму давялося прайсці праз рукі Мікалая, адгукаюцца аб ім як аб выдатным спецыялісце, паважлівым і шчырым чалавеку. Перад тым, як рабіць масаж, ён заўсёды спытае ў пацыента пра самаадчуванне, падтрымае добрым словам. Адкрыты і ветлівы, ён з першых слоў размовы выклікае прыхільнасць. Па-майстэрску спрытна і ў той жа час далікатна спецыяліст праводзіць масаж, раз-пораз пытаецца, ці зручна чалавеку, ці не турбуе яго што-небудзь.
Ёсць у Мікалая і пастаянныя пацыенты, якія, пры вызначэнні масажыста, выказваюць пажаданне прайсці лячэнне менавіта ў яго. А гэта, бадай, самая высокая адзнака стараннай і добрасумленнай працы.
Рыгор КАГАН,
ветэран працы.