Хуткімі тэмпамі
У сакавіку бягучага года па вул.Ленінскай, 10 былі распачаты работы па ўзвядзенні 16-кватэрнага чатырохпавярховага дома для асоб ільготнай катэгорыі. Генеральны падрадчык будаўніцтва — ДУКДБП “Кіраўская ПМК-255”.
На здзіўленне многіх кіраўчан, літаральна праз два месяцы з пачатку работ па вул.Ленінскай, вырас будынак дома-прыгажуна. Яго будаўніцтва вядзецца за кошт сродкаў рэспубліканскага, абласнога і мясцовага бюджэтаў.
Як адзначыў у размове з карэспандэнтам раённай газеты начальнік ПМК-255 Ігар Лазаковіч, зараз на гэтым аб’екце задзейнічана амаль палова ўсяго калектыву арганізацыі: муляры, дзве брыгады аддзелачнікаў, плітачнікі, сталяры і іншыя.
Што тычыцца муляраў, сваю частку работ яны ўжо практычна завяршылі. Распачалася ўнутраная і вонкавая аддзелка будынка. Вядзецца ўцяпленне фасаду дома, мантаж вокнаў, балконаў, сцяжка падлогі, пракладваюцца ацяпляльныя камунікацыі і іншае.
Агульны тэрмін увядзення ў строй гэтага аб’екта — 4 месяцы. Але кіраўніцтва і будаўнікі ПМК-255 прыкладаюць усе намаганні, каб здаць новабудоўлю ў найкарацейшыя тэрміны. Фінансаванне будаўніцтва вядзецца своечасова, таму ў задзейнічаных на аб’екце работнікаў ёсць зацікаўленасць у хуткай і якаснай рабоце.
Па словах прараба будаўніцтва Дзяніса Сцерлінгава, стараннасцю ў працы вызначаецца брыгада муляраў пад кіраўніцтвам Паўла Акалатовіча, тынкоўшчыкаў-аддзелачнікаў — Надзеі Марцючэнка, ды і ўвогуле ўсе задзейнічаныя на аб’екце — спецыялісты сваёй справы, адказныя і добрасумленныя работнікі.
Фота Максіма МІКЕШЫНА.