Падзеі Вялікай Айчыннай вайны ніколі не сатруцца з памяці народнай і будуць жыць вечна. Гэтаму садзейнічаюць і пастаянна праводзімыя  мерапрыемствы, у ходзе якіх расказваецца аб подзвігу нашага народа ў барацьбе з ненавісным ворагам, на сустрэчах з маладым пакаленнем  удзельнікі баявых дзеянняў дзеляцца сваімі ўспамінамі. А яшчэ кожная сям’я захоўвае сваю памяць: з палёў бою не вярнуліся жывымі іх родныя, якія не пашкадавалі свайго жыцця дзеля нашай мірнай будучыні.

На мінулым тыдні велапрабег у межах акцыі “За здароўем — на веласіпедзе!”, прысвечаны 70-годдзю вызвалення Рэспублікі Беларусь ад нямецка-фашысцкіх захопнікаў з перадачай эстафеты Агню Славы і памяці герояў праводзіўся на тэрыторыі Стайкаўскага сельсавета.
У пятніцу прадстаўнікі Любоніцкага сельсавета прывезлі лампаду з Агнём Славы і памяці герояў у в.Чыгірынка і перадалі яе вучням сярэдняй школы. Далей усе на веласіпедах праехалі да брацкай магілы, дзе адбыўся жалобны мітынг. Мінутай маўчання прысутныя ўшанавалі памяць загінуўшых у гады Вялікай Айчыннай вайны.
Затым каля мясцовага сельскага Дома культуры адбыўся канцэрт мастацкай самадзейнасці, падрыхтаваны вучнямі мясцовай школы. Для прысутных гучалі песні і вершы на ваенную тэматыку.
Назаўтра жыхары а/г Стайкі сабраліся каля мясцовага сельскага клуба, каб прыняць удзел у велапрабегу. Лампаду з Агнём Славы і памяці герояў дырэктар Чыгірынскай СШ Вольга Осіпава перадала прадстаўнікам маладога пакалення аграгарадка. Далей быў дадзены старт вела-прабегу. У ім прымалі ўдзел людзі розных узростаў, нават некаторыя бабулі ехалі на веласіпедах разам з маленькімі ўнукамі. Каля брацкай магілы ўсе прысутныя ўшанавалі памяць загінуўшых воінаў і партызан, якія ў гады вайны загінулі за вызваленне гарадоў і вёсак. У сваіх выступленнях людзі сталага ўзросту гаварылі аб захаванні міру на роднай зямлі, заклікалі моладзь прадаўжаць традыцыі дзедаў і бацькоў, ніколі не забываць тых жудасных выпрабаванняў, якія выпалі на іх лёс.
Затым мера-прыемства праходзіла каля мясцовага сельскага клуба. Сваімі ўспамінамі з аднавяскоўцамі падзяліўся былы вязень фашысцкіх канцлагераў А.Р.Волкаў. Ён расказаў аб тых цяжкіх днях, якія правёў за калючым дротам і што давялося перажыць. Са словамі ўдзячнасці старэйшаму пакаленню за іх мужнасць і гераізм, праяўленыя ў гады вайны, выступіла Дар’я Храмцова, якая прачытала верш “Дзякуй вам…” Для прысутных быў падрыхтаваны канцэрт “Наша памяць — вам ва ўзнагароду!”. Сваімі музычнымі нумарамі радавалі гледачоў Алеся Мельнікава, Анастасія Савянкова, Дар’я Храмцова. У мясцовых жыхароў былі слёзы на вачах, калі для іх Пётр Лапацінскі і Алена Медзвядзёва выконвалі песні “Журавы” і “Баявыя ордэны”.
Наступным населеным пунктам, якому будзе перададзены Агонь Славы і памяці герояў, стане в.Стаўпішчы.
Ніна ШАБОЛДА,
загадчык Стайкаўскага сельскага клуба.
На здымках: фрагменты з мерапрыемства ў а/г Стайкі.