Зазелянее парк дружбы!
Калі ўсе разам, калі ўсе дружна, то любая справа ладзіцца хутчэй і весялей, а атрыманы вынік не можа не радаваць. Менавіта так напярэдадні свята Вялікай Перамогі на базе санаторыя імя К.П.Арлоўскага прайшла акцыя па пасадцы дрэў. Актыўны ўдзел у ёй, акрамя работнікаў санаторыя, прынялі і адпачываючыя тут грамадзяне з самых разных куткоў не толькі Беларусі, але Расіі і Латвіі.
Дырэктар санаторыя Вольга Гаршкова расказала, што гэтым учынкам яны вырашылі ўшанаваць памяць аб тых, хто вызваляў народы ад нямецка-фашысцкіх захопнікаў, хто падарыў мір і свабоду будучым пакаленням.
Першымі новымі насельнікамі парка сталі дрэўцы чырваналіснага дуба.
У гутарцы з карэспандэнтам раённай газеты Вольга Гаршкова, адзначыла, што адпачываючыя з задавальненнем падтрымалі прапанову прыняць удзел у пасадцы дрэў. Работу па азеляненні тэрыторыі санаторыя плануецца працягваць і надалей: акрамя чырваналіснага дуба тут будуць высаджаны лістоўніца, ліпа, усяго больш за 100 дрэў.
Акрамя таго, адзначыла дырэктар санаторыя, зараз яны разам з настаўнікамі і вучнямі гімназіі распрацоўваюць вялікі экалагічны праект “Аздараўленчая сцежка”. У яго будуць уваходзіць парк, штучныя азёры, прыродныя крыніцы і іншыя прыгожыя мясціны тэрыторыі санаторыя. Зараз у парку жывуць вавёркі, заяц-русак, казуля, у возеры — выдра, розная рыба.
Сваімі ўражаннямі аб удзеле ў акцыі па пасадцы дрэў і адпачынку ў санаторыі падзяліўся з “раёнкай” жыхар г.Сыўтыўкар Рэспублікі Комі Расійскай Федэрацыі Аляксандр Сажын (на верхнім здымку злева, побач з В.У.Гаршковай):
— У вашай краіне я ўпершыню, хаця прыехаць сюды марыў заўсёды. Шчыра кажучы, да Беларусі і беларускага народа ў мяне самае пазітыўнае стаўленне, паважаю вашага Прэзідэнта А.Р. Лукашэнку.
Прыехаць на адпачынак менавіта ў санаторый імя К.П.Арлоўскага мне параіў расійскі тураператар. Я хацеў адпачыць і аздаравіцца ў спакойным, прыгожым і нешматлюдным месцы, менавіта ўсё гэта я і знайшоў тут.
Хадзіў на экскурсію ў горад. Ён мне вельмі спадабаўся: прыгожы, утульны, паўсюль пануе такая чысціня!
Рады і таму, што падчас адпачынку скарыстаў магчымасць пабываць на адной з гульняў Чэмпіянату свету па хакею-2014 у Мінску.
Што тычыцца акцыі па пасадцы дрэў, то лічу гэта выдатнай ідэяй. Шчыра кажучы, менавіта тут, у санаторыі, я ўпершыню ў сваім жыцці пасадзіў дрэва, і гэты факт мяне радуе. Прыемна будзе думаць, што дзесьці ў беларускім горадзе расце дрэва, пасаджанае мной.
Фота
Максіма МІКЕШЫНА.