Дакладна наладжаны комплекс работ па нарыхтоўцы кармоў для грамадскага статка з траў першага ўкосу ў СВК “Рассвет” імя К.П.Арлоўскага. У мінулую пятніцу карэспандэнты “раёнкі” пабывалі на полі і каля сянажнай ямы ў в.Стаўпішча, дзе кіпела работа на «зялёным канвееры».
Як адзначыў намеснік старшыні гаспадаркі Аляксандр Жылінскі, задачы па нарыхтоўцы кармоў у колькасным выражэнні ў рассветаўцаў наступныя: сенажу — 22900 тон, сена — 1700 тон, агульныя плошчы, на якіх трэба скасіць травы — 2506 га. Безумоўна, вялікая ўвага надаецца таму, каб назапасіць для жывёлы якасныя кармы. Плануецца запрэсаваць у стрэйч-плёнку 4000 тон сенажу.
Поле, на якім шчыравала тэхніка, кіруемая ўмелымі рукамі механізатараў, — 138 га, яго меркавалі ўбраць за два дні.
За штурвалам аднаго з кормаўборачных камбайнаў быў Міхаіл Вербенка (на здымку): у гэтай справе ён сапраўдны ас, ужо не першы год паказвае на “зялёным жніве” высокія рэзультаты. Па выніках рэспубліканскага спаборніцтва за дасягненне высокіх паказчыкаў па нарыхтоўцы травяных кармоў у 2013 годзе ён стаў пераможцам і быў узнагароджаны Ганаровым дыпломам за 1-е месца і легкавым аўтамабілем. І зараз на корманарыхтоўцы вопытны механізатар не губляе ніводнай спрыяльнай хвіліны. Думаецца, ёсць надзеі на новыя працоўныя перамогі!
Побач з Міхаілам Вербенкам на кормаўборачным камбайне на гэтым полі працаваў Віталь Кашкоў.
На тэрыторыі фермы “Стаўпішча” ішла закладка сянажнай ямы. На адвозцы зялёнай масы былі задзейнічаны вадзіцелі Дзмітрый Кахновіч, Іван Кавалеўскі, Міхаіл Букаты, Міхаіл Елісеенка, Павел Бяляўскі, Сяргей Крапіўніцкі і іншыя.
Пад спякотным сонцам кіпела работа, без збояў працавала тэхніка. Згодна патрабаванняў тэхнікі бяспекі ў полі заўсёды дзяжурыць пажарная машына, якой кіруе Сяргей Камінскі.