Вогненнымі дарогамі вайны…

zgitbor

Дзень 15 чэрвеня 1942 г. стаў апошнім днём для 1800 жыхароў Борак і іншых населеных пунктаў Грыбавецкага сельсавета. На світанку немцы акружылі вёскі, выганялі з хат і расстрэльвалі мірных жыхароў: жанчын, дзяцей, састарэлых. Закончыўшы сваю крывавую расправу, у сярэдзіне дня фашысты падпалілі ўсе 7 вёсак.
На мітынгу з нагоды велапрабегу ў межах акцыі “За здароўем — на веласіпедзе!”, прымеркаваную да 70-годдзя вызвалення Рэспублікі Беларусь ад нямецка-фашысцкіх захопнікаў, у в.Боркі ва ўсіх прысутных на вачах не высыхалі слёзы. Слёзы горычы, болю і пакут…
Сведка тых далёкіх падзей Марыя Васільеўна Шпакоўская расказала, як восенню 1942 года застаўшыеся ў жывых вяскоўцы пабудавалі невялікія хаты, але акупанты іх спалілі. Пасля жыхары вёскі яшчэ двойчы ўзводзілі жылыя пабудовы, толькі немцы іх зноў і зноў знішчалі. Людзям да вызвалення раёна ад нямецка-фашысцкіх захопнікаў давялося жыць у зямлянках у лесе.
Ветэран Вялікай Айчыннай вайны Аляксандр Фёдаравіч Яромін пажадаў усім прысутным, каб памяць аб загінуўшых земляках жыла ў іх сэрцах вечна. Ён таксама засяродзіў увагу прадстаўнікоў маладога пакалення на тое, каб яны і надалей дапамагалі ўдзельнікам тых далёкіх ваенных падзей, агортвалі іх увагай і клопатам, а таксама пастаянна ўтрымлівалі тэрыторыю вакол помніка загінуўшых у належным парадку.
Затым старшыня Скрыпліцкага сельсавета Жанна Рышкевіч перадала лампаду з Агнём Славы і памяці герояў прадстаўнікам маладога пакалення вёскі Боркі.
Да брацкай магілы былі ўскладзены кветкі ад удзячных нашчадкаў. Памяць загінуўшых у гады ваеннага ліхалецця ўшанавана мінутай маўчання.
Затым быў дадзены старт удзельнікам велапрабегу.
На здымку:сведка жудаснай трагедыі ў в.Боркі М.В.Шпакоўская і ветэран Вялікай Айчыннай вайны А.Ф.Яромін.

Добавить комментарий

Ваш адрес email не будет опубликован.