Да збору другаснай сыравіны — па-гаспадарску

Актуальнасць збору другаснай сыравіны для Беларусі з кожным годам узрастае і ў першую чаргу гэта звязана з тым, што наша краіна не можа пахваліцца багаццем прыродных рэсурсаў.
Другасная сыравіна значна таннейшая за пярвічныя рэсурсы. Яе выкарыстанне дазваляе істотна скарачаць расходы на неабходную вытворчасці сыравіну, што ў сваю чаргу робіць нашу прадукцыю больш канкурэнтназдольнай як на ўнутраных, так і на знешніх рынках.

На нарадзе ў райвыканкаме было абмеркавана пытанне аб тым, як наладжаны збор, нарыхтоўка і перапрацоўка другаснай сыравіны суб’ектамі гаспадарання раёна, у тым ліку і выкананне плана дзяржзаказу.
У адпаведнасці з рашэннем райвыканкама ад 26 мая №11-25 «Аб некаторых мерах па рэалізацыі Пастановы Савета Міністраў РБ ад 25 красавіка 2014 года №394» арганізацыям, установам і сельгаспрадпрыемствам раёна даведзена заданне па збору шкла, паперы, кардону, полі-этылену, ПЭТ-бутэлек, гумы ў якасці другаснай сыравіны. Двум буйным нарыхтоўшчыкам — райспажыўтаварыству і УКП “Жылкамгас” даведзена заданне ў межах дзяржзаказу па дзвюх пазіцыях: шкло і папера. Па выніках першага паўгоддзя бягучага года дзяржзаказ па шкле імі выкананы. Што тычыцца паперы і кардону, выкананне склала 16,7 % гадавога плана. Райспажыўтаварыству і УКП «Жылкамгас» рэкамендавана актывізаваць работу ў гэтым напрамку.
Лепшым чынам абстаяць справы з нарыхтоўкай гумы: пры заданні на паўгоддзе ў 87 т раёнам на перапрацоўчыя пункты пастаўлена 109,8 т (126,2%).
Некаторыя з прысутных кіраўнікоў выказалі незадаволенасць высокімі планамі нарыхтоўкі другаснай сыравіны, аднак кіраўніцтвам раёна было заўважана, што калі зазірнуць на змесціва нашых звалак ды міні-палігонаў цвёрдых камунальных адходаў, то іх тэрыторыя — своеасаблівы Кландайк: там і кардон, і поліэтылен, і ПЭТ-бутэлькі, і шкло, і гума. Усё гэта можна было б не выкідваць, а здаваць на прыёмныя пункты, што дазволіла б выконваць даведзеныя заданні, а таксама ўносіць немалаважны ўклад у паляпшэнне экалогіі.
Брыгадай УКП “Жылкамгас” праводзяцца работы па сартыроўцы камунальных адходаў на міні-палігонах, аднак у адзіночку камунгасаўцы не ўстане справіцца з той колькасцю “карысных” рэчаў, якія сюды вывозяцца. Неабходна, каб на прадпрыемствах і ў арганізацыях стаялі скрыні для раздзельнага збору адходаў. Пакуль у гэтым накірунку работа ідзе слаба. Прыкладам таму стала дэманстрацыя фотаздымкаў, якія былі зроблены падчас праведзенага па арганізацыях горада рэйду. У скрынях для смецця знаходзіліся так неабходныя для выканання плана папера, шкло, ПЭТ-бутэлькі і іншае. Недапушчальнай з’яўляецца і сітуацыя, калі з магазінаў у кантэйнеры выкідваюцца кардон, папера. Гандлёвыя прадпрыемствы абавязаны складзіраваць усё гэта і па меры назапашвання здаваць.
Многія прадпрыемствы, арганізацыі, установы, дарэчы, праявілі актыўнасць па збору другаснай сыравіны і па некаторых пазіцыях выканалі гадавыя планы. У ліку такіх, напрыклад, сельскія Саветы дэпутатаў, СВК “Рассвет” імя К.П.Арлоўскага, “Добасна-агра”, “Калгас “Беларусь”, ліцэй №15, аддзел адукацыі, спорту і турызму райвыканкама і іншыя. Але ёсць і такія, хто не сабраў і не здаў на нарыхтоўчыя пункты ніводнага кілаграма другаснай сыравіны.
Не павінна стаяць у баку ад гэтай важнай справы і насельніцтва, бо нельга вырашыць праблему раздзельнага збору смецця без асэнсаванага падыходу да гэтай справы кожнага чалавека. Трэба разумець, што ўсё гэта —каштоўныя рэсурсы. Наша задача — аказваць пасільную дапамогу ў вырашэнні дзвюх важнейшых дзяржаўных задач: эканамічнай і экалагічнай.
Людміла СЯМЁНАВА.

Добавить комментарий

Ваш адрес email не будет опубликован.