Новыя імёны на брацкай магіле

Напярэдадні 70-й гадавіны вызвалення Беларусі ад нямецка-фашысцкіх захопнікаў каля брацкай магілы ў а/г Баравіца адбыўся ўрачысты мітынг, прысвечаны адкрыццю мемарыяльнай дошкі, на якой увекавечаны прозвішчы чатырох лётчыкаў, якія загінулі на тэрыторыі Баравіцкага сельсавета 30 чэрвеня 1944 года.

Старшыня Баравіцкага сельвыканкама Алена Пашкевіч нагадала прысутным імёны герояў, якія аддалі свае жыцці за вы-зваленне нашага раёна ад ворага: Іван Цімафеевіч Белакапыльскі, Антон Іванавіч Кальвін, Мікалай Ільіч Марковін, Аляксей Фёдаравіч Марчанка. Пошукам іх магіл займаліся вучні былой Скачкоўскай школы, і ў 1970 годзе лётчыкі былі перапахаваны ў брацкай магіле в. Баравіца. Спонсарскую падтрымку па вырабу мемарыяльнай дошкі аказала раённае аддзяленне ГА “Беларускі фонд міру”.
Звяртаючыся да прысутных, начальнік аддзела ідэалагічнай работы, культуры і па справах моладзі райвыканкама Андрэй Карпук адзначыў, што кожны з нас павінен заўжды памятаць тых, хто цаной уласнага жыцця заваяваў мір і свабоду на нашай зямлі. Маладому пакаленню аграгарадка ён пажадаў сваімі ўчынкамі праслаўляць малую радзіму, а таксама памятаць і шанаваць слаўную гісторыю беларускага народа.
Сваімі ўспамінамі аб перажытым у гады Вялікай Айчыннай вайны падзялілася былы вязень канцлагера “Азарычы” Зінаіда Мікалаеўна Каранкевіч. Калі пачалася вайна, ёй было ўсяго пяць з паловай гадоў. Гуляючы неяк за вёскай, маленькая Зіна разам з рабятамі сталі сведкамі паветранага бою савецкіх і варожых самалётаў — так для дзяўчынкі пачалася вайна. Пазней у іх вёсцы Ала з’явіліся фашысты. Аднойчы карнікі загадалі вяскоўцам сабрацца за вёскай і пагналі іх пешшу да в.Выжары, дзе пагрузілі ў машыны і павезлі на чыгуначную станцыю ў Бабруйск. Пазней яны трапілі ў канцлагер “Азарычы”. Тое, што давялося перажыць, дзіцячая памяць Зінаіды Мікалаеўны захавала на ўсё жыццё: сакавіцкае надвор’е, вакол уперамешку снег і брудная вада, холад і голад, дзесяткі смерцяў кожны дзень, многім не давялося вырвацца жывымі з гэтага жаху…
З.М.Каранкевіч дала наказ маладому пакаленню берагчы мір на зямлі, шанаваць памяць аб людзях, падарыўшых магчымасць жыць, вучыцца і працаваць у незалежнай і квітнеючай Беларусі.
Ганаровае права адкрыць мемарыяльную дошку было прадастаўлена кіраўніку раённага аддзялення ГА “Беларускі фонд міру” Вользе Гаршковай і Зінаідзе Мікалаеўне Каранкевіч. Памяць загінуўшых у гады Вялікай Айчыннай вайны была ўшанавана мінутай маўчання. У знак удзячнасці і павагі прысутныя ўсклалі на брацкую магілу кветкі.
Людміла СЯМЁНАВА.
Фота аўтара.

Добавить комментарий

Ваш адрес email не будет опубликован.