«Дзеля хлеба на стале — смачнага, духмянага!»

dozgali devchata

У мінулую суботу на свежай сцярні адной з ніў СВК “Рассвет” імя К.П.Арлоўскага, па-святочнаму расквечанай флагамі, было ўрачыста адзначана самае важнае сялянскае свята — “Дажынкі”. Хлебаробы, за гадзіну дагэтуль яшчэ сядзеўшыя за штурваламі камбайнаў, дамалочваючы апошнія гектары збожжавых, а таксама вадзіцелі, спецыялісты — усе, хто меў дачыненне да жніва, выстраіліся на такіх знаёмых і родных для ўсіх палетках. Стомленыя, але вельмі задаволеныя: каравай сёлета атрымаўся важкім!

Ганаровае права ўзняць Дзяржаўны флаг Рэспублікі Беларусь было прадастаўлена бясспрэчным лідарам жніва — старшаму камбайнеру Івану Кавалеўскаму і вадзіцелю Віктару Маковічу.
Са знамянальнай падзеяй — завяршэннем уборкі збожжавых — павіншаваў прысутных, а ў іх асобе ўвесь працоўны калектыў, старшыня СВК “Рассвет” імя К.П.Арлоўскага Аляксандр Багель. Ён падкрэсліў, што сёлетні багаты ўраджай — заслуга многіх: тых, хто араў глебу, сеяў, уносіў угнаенні, апрацоўваў палі ядахімікатамі і, зразумела, хто з раніцы да позняга вечара ўбіраў хлеб. І самае галоўнае, ён быў убраны своечасова і без страт!
Аляксандр Багель прывёў зусім свежыя, падсумаваныя і выведзеныя напярэдадні ўрачыстасці лічбы: па выніках жніва-2014 рассветаўцы атрымалі 17845,5 тоны збожжа пры ўраджайнасці 50,6 ц/га (леташні намалот склаў 14183 тоны). Рапсу намалочана 2972 тоны, у гаспадарцы мяркуюць дасягнуць паказчыка ў 3 тыс. тон з улікам застаўшагася ўчастка ў 20 га, які будзе ўбраны крыху пазней.
Старшыня адзначыў, што ўсе дастойна, адказна адпрацавалі на жніве і назваў тых, хто вылучыўся па паказчыках: сярод экіпажаў збожжаўборачных камбайнаў першае месца — у экіпажа на чале са старшым камбайнерам Іванам Кавалеўскім, які намалаціў 2294,3 т, другое месца — у Аляксандра Бяляўскага — 2277 т, трэцяе — у Мікалая Белакурскага — 2230 т. Сярод камбайнераў “Рассвета” ўсе — тысячнікі, намалот у 2 тысячы тон пераадолелі, акрамя названых вышэй, Віктар Віліўчанка і Валерый Піскуноў, крыху недабраў да гэтай лічбы з прычыны паломкі тэхнікі вопытны хлебароб, ветэран гаспадаркі Іван Салановіч.
Сярод вадзіцеляў першае месца ва ўпартай барацьбе заваяваў малады рассветавец Віктар Маковіч: ён перавёз 3045 т збожжа, на другім месцы — Аляксандр Бабіч — 2963 т, на трэцім — ветэран калектыву Генадзь Гукаў — 2819 т.
Не змаглі прысутнічаць на ўрачыстасці не менш важныя ўдзельнікі ўборачнай кампаніі — аператары зернесушыльнай гаспадаркі, у якіх у гэты час яшчэ шмат работы па дапрацоўцы збожжа.
Аляксандр Багель з нізкім паклонам шчыра падзякаваў усім, хто прымаў удзел ва ўборцы хлеба: і тым, хто непасрэдна ўбіраў яго на полі, і спецыялістам на чале з першым намеснікам старшыні гаспадаркі Аляксандрам Жылінскім, і намесніку старшыні па ідэалагічнай рабоце Наталлі Шапавалавай, і тым, хто забяспечваў харчаванне ўдзельнікаў жніва, і яго пажарную бяспеку…
Аляксандр Іванавіч з упэўненасцю адзначыў, што працоўнаму калектыву “Рассвета” па сілах вырашэнне любых задач, і яшчэ не раз на яго рахунку будуць працоўныя перамогі!
Старшыні быў уручаны святочны каравай ураджаю 2014 года, а ён выказаў пажаданне, каб рассветаўскі каравай з кожным годам станавіўся ўсё больш важкім.
З “Дажынкамі” павіншавалі прысутных першы намеснік старшыні СВК “Рассвет” імя К.П.Арлоўскага Аляксандр Жылінскі, лепшы старшы камбайнер Іван Кавалеўскі.
Работнікі раённага Дома культуры падарылі ўсім свае задушэўныя песні, і раптам на нейкай чарговай ноце на выпаленыя сонцам палеткі з небасхілу літаральна хлынуў шчодры цёплы дождж. Гавораць, што дождж — добрая прыкмета. Так што, у рассветаўцаў наперадзе сапраўды новыя працоўныя перамогі!
Наталля ХАДАКОВА.
Фота
Максіма МІКЕШЫНА.
На здымках: духмяны каравай новага ўраджаю — старшыні СВК «Рассвет» імя К.П.Арлоўскага Аляксандру Багелю; «Дажынкі» — важная падзея!

Добавить комментарий

Ваш адрес email не будет опубликован.