Працавалі зладжана, з агеньчыкам!
Сёлетнім караваем працаўнікі СВК “Добасна-агра” могуць быць задаволены: намалоты аказаліся рэкорднымі — сабралі 5965 т збожжа (перавышаны паказчык нават самага ўраджайнага для гаспадаркі 2012 года, калі было атрымана 5080 т), сярэдняя ўраджайнасць склала 48 ц/га.
На палетках зладжана працавалі 9 экіпажаў, у іх састаў увайшлі самыя вопытныя механізатары, за плячамі якіх не адно жніво. Штодня з бункераў іх камбайнаў на ток паступала да 700 тон збожжа. Вельмі парадавалі хлебаробаў участкі азімага трэцікале — 70 ц/га, азімай пшаніцы — 56 ц/га, азімага жыта — 51 ц/га. А вось намалоты яравых культур унеслі адмоўныя карэктывы ў агульныя паказчыкі: ячмень даў па 37 ц/га, авёс — па 36 ц/га, зернебабовыя — па 35 ц/га.
Да ўборкі ў сельгаспрадпрыемстве падрыхтаваліся грунтоўна: своечасова адрамантавалі збожжаўборачныя камбайны, давялі да ладу сушыльную гаспадарку, распрацавалі меры маральнага і матэрыяльнага стымулявання, графік дзяжурстваў спецыялістаў. А самае галоўнае — падабраліся вопытныя механізатары, душой хварэючыя за агульную справу. Дзякуючы іх сумесным намаганням, самаадданай працы — уборка хлеба тут прайшла без збояў. Толькі камбайны свае дабаснянцы не пагналі на мехдвор, а паехалі дапамагаць сусе-дзям — хлебаробам СВК “Чырвоны баец”.
СВК “Добасна-агра” поўнасцю разлічылася з дзяржавай: на прыёмныя пункты пастаўлена 1150 тон збожжа. Пад патрэбу засыпана пасяўнога матэрыялу, у дастатковай колькасці назапашана і фуражу.
Гэтае жніво для старшыні сельгаскааператыва Аляксандра Дастанкі — першае. Але, як адзначыў першы намеснік начальніка райсельгасхарчу Мікалай Пад’ялоўскі, з боку маладога кіраўніка прадпрымаліся правільныя падыходы ў вырашэнні надзённых пытанняў, ён граматна арганізоўваў уборачны працэс.
А ў тым, што ўборку завяршылі ў ліку першых у раёне, Аляксандр Дастанка ўпэўнены, — заслуга механізатараў. Сярод лідараў — Мікалай Галомзік і Іван Панталонаў, на іх рахунку 1579 т збожжа, сямейны экіпаж Алега і Паўла Бычковых (957,3), браты Васіль і Іван Есянецкія (932 т), сямейны экіпаж Івана і Пятра Зубавых (816 т). Старанна працавалі вадзіцелі Сяргей Скрыпуноў, які перавёз 2024 т збожжа, а таксама Яўген Кавалёў (1445 т), Мікалай Асташоў (955 т). На сушыльным комплексе зладжана шчыравала звяно ў складзе Пятра Драздова і Андрэя Хусанава, якія давялі да ладу 687 т збожжа.
Таццяна БАРАДЗІНА.