Рэкордныя намалоты хлебаробаў “Чыгірынкі”

bobry bobr2 chig3 chig

namaze

Добры ўраджай вырашчаны сёлета хлебаробамі сельгасфіліяла. Сярэдняя ўраджайнасць збожжавых складае больш чым 47 ц/га (леташні паказчык — 33,5 ц/га). А цана хлеба, як вядома, складаецца з вялікіх агульных намаганняў усіх, пачынаючы ад механізатара да кіраўніка.
Па словах дырэктара сельгасфіліяла Ігара Кузняцова, значную дапамогу ў атрыманні небывалага для іх палеткаў ураджаю збожжавых аказала дырэкцыя галаўнога прадпрыемства РУП “Беларуснафта-Магілёўаблнафтапрадукт” на чале з яго кіраўніком Аляксандрам Саханенкам. Дзякуючы іх матэрыяльнай падтрымцы былі набыты ўсе неабходныя ўгнаенні і хімпрэпараты, закуплена новая сельгастэхніка, і зараз своечасова пастаўляюцца запасныя часткі для тэхнікі і і паліва.
У мінулую сераду разам з галоўным аграномам гаспадаркі Іванам Мухіным карэспандэнты “раёнкі” наведаліся на палеткі сельгасфіліяла, што раскінуліся за вёскай Боркі. Тут чатыры збожжаўборачных камбайны, павольна рухаючыся па полі, жалі ячмень.
— Убіраючы гэтую культуру, асабліва не паспяшаешся, — растлумачыў галоўны аграном, — ячмень — культура далікатная, яго трэба старанна абмалаціць.
За камбайнамі КЗС заставалася шырокая ўбраная на нізкім зрэзе паласа і густыя радкі саломы, не ўбачылі мы на палетках ні нявымалачаных каласкоў, ні згубленых зярнятак.
Трэба адзначыць, у СГФ “Чыгірынка” значную стаўку на ўборачных і пасяўных работах робяць на моладзь, давяраюць ёй новую тэхніку і не памыляюцца. Для Сяргея Гарулёва, нягледзячы на малады ўзрост, гэта ўжо чацвёртае жніво. Сёлета юнак на працягу ўсёй уборачнай вызначаецца стараннасцю і адказнасцю, працуе ён разам са сваім дзядзькам Аляксандрам. У лідарах на збожжавай ніве і маладзёжны экіпаж двух Сяргеяў — Юхнаўца і Цыбульскага. У свой час хлопцам выдзелілі новы камбайн, а яны ў сваю чаргу заўсёды своечасова і якасна рыхтуюць яго да ўборачнай, таму і ўдаецца праводзіць жніво без збояў і паломак.
Хутка дастаўляюць збожжа на ачышчальна-сушыльную гаспадарку Валерый Замкоў, Мікалай Гараўцоў і Міхаіл Юхнавец. Больш за 400 т збожжа ў залік дзяржзаказу на гэты дзень, перавёз на перапрацоўчыя прадпрыемствы Іван Куляшоў.
Добрым стымулам для руплівай і стараннай працы з’яўляюцца ўважлівыя адносіны да працаўнікоў з боку кіраўніцтва гаспадаркі. Механізатары забяспечаны спецвопраткай, сродкамі аховы, гарачыя і смачныя абеды і вячэры дастаўляюцца прама на палеткі. Задавальняюць удзельнікаў жніва і заробкі.
Добры падмурак пад сёлетні ўраджай заклалі ў гаспадарцы яшчэ з восені, не ўпусцілі спрыяльныя тэрміны і вясной. У дастатковай колькасці была ўнесена арганіка, мінеральныя ўгнаенні і падкормкі, своечасова правялі абарону раслін ад хвароб, пустазелля і шкоднікаў. Вось і атрымалі адпаведны вынік, ураджайнасць збожжавых культур, асабліва для іх земляў, як гаворыцца, “зашкальвае”. Напрыклад, трыцікале, якое займала плошчу ў 100 га дало на круг па 55,4 ц/га, а месцамі і ўвогуле па 65-70 ц/га, для гаспадаркі такі паказчык — рэкорд. Парадавалі і жытнёвыя палеткі: намалоты вышэйшыя, чым у мінулым годзе, працэнтаў на 40. Плануюць сабраць і неблагі ўраджай ячменю, які раскінуўся на 90 га, ужо зараз ён дае ў сярэднім на 12 ц/га больш, чым у мінулым годзе. Не можа не радаваць хлебаробаў “Чыгірынкі” і тое, што значна ўдасца пе- раўзысці валавы збор збожжавых мінулага года, тут плануюць сабраць каля 2000 т (2013 г. — 1507 т). Паспяхова справіліся і з выкананнем дзяржзаказу, а дакладней, з яго перавыкананнем у некалькі разоў. Пры плане здачы ў 420 т гаспадарка паставіла на перапрацоўчыя прадпрыемствы больш за 1200 т. У будучым гэта дазволіць мець у дастатковай колькасці камбікармы для жывёлы.
На вызваленыя ад ураджаю палі накіроўваюцца прэс-падборшчыкі, пагрузчыкі і рулонавозы, каб аператыўна ўбраць салому і падрыхтаваць глебу пад будучую сяўбу.
— Мы мяркуем сёлета максімальна засеяць вызваленыя ад збожжавых плошчы пажніўнымі культурамі, — дзеліцца планамі галоўны аграном Іван Мухін, — у гаспадарцы вялікі статак БРЖ, а пасяўныя плошчы, наадварот, невялікія, таму нам нельга дапускаць, каб зямля пуставала.
Паказчыкі, якіх дабіліся ў “Чыгірынцы”, сведчаць аб адказнасці, працавітасці кожнага ўдзельніка жніва.
Людміла СЯМЁНАВА.
Фота
Максіма МІКЕШЫНА.
На здымках: камбайнеры Сяргей і Аляксандр Гарулёвы; лідары жніва — маладзёжны экіпаж у саставе Сяргея Юхнаўца і Сяргея Цыбульскага; кіраўніцтва сельгасфіліяла задаволена работай студатрадаўцаў з Бабруйскага будаўнічага каледжа; перадавы вадзіцель Валерый Замкоў.

Добавить комментарий

Ваш адрес email не будет опубликован.