Для ўсіх і ў кожны дом
Згодна рашэння 14 кангрэса Сусветнага паштовага саюза Сусветны дзень пошты адзначаецца штогод 9 кастрычніка — у дзень стварэння саюза ў 1874 годзе. Тады ў Берне (Швейцарыя) прадстаўнікамі 22 краін быў падпісаны дагавор, які паклаў пачатак стварэнню Генеральнага паштовага саюза. У 1878 годзе ён быў перайменаваны і з таго часу носіць назву Сусветнага паштовага саюза. Зараз ён налічвае ў сваім саставе 192 краіны.
Пошта прызначана для забеспячэння надзейнай, эфектыўнай і эканамічнай перавозкі перыёдыкі, перасылкі пісьмовай карэспандэнцыі, паскоранай пошты. Акрамя аказання традыцыйных паслуг супрацоўнікі актыўна працуюць па прыёму плацяжоў па крэдытах, за мабільную і стацыянарную сувязь, камунальныя паслугі, афармляюць заяўкі на тавары айчыннай вытворчасці па каталогах і дастаўляюць іх.
Зараз на Кіраўшчыне функцыянуюць 18 аддзяленняў паштовай сувязі, 16 з іх — у сельскай мясцовасці, 1 — у горадзе і яшчэ 1 — перасовачнае. Апошняе, дарэчы, прыйшло на змену нерэнтабельным стацыянарным аддзяленням, а таксама дазволіла пашырыць і геаграфію абслугоў-вання — паштовы аўтамабіль 5 разоў на тыдзень (акрамя суботы і нядзелі) наведваецца ў сельскія населеныя пункты, дзе стацыянарнага аддзялення ніколі і не было. У вяскоўцаў з’явілася магчымасць набываць розныя тавары — ад газет да харчовых прадуктаў і бытавой хіміі, складанай бытавой тэхнікі. Па жаданні пакупніка работнікі афармляюць заказ на неабходны тавар і ў кароткія тэрміны ён дастаўляецца.
Начальнік раённага вузла паштовай сувязі Людміла Гушчына адзначыла, што асаблівых слоў падзякі заслугоўваюць паштальёны, а гэта 51 чалавек, з іх 8 — у гарадскім аддзяленні паштовай сувязі, астатнія 43 абслугоўваюць жыхароў сельскіх населеных пунктаў. «Асноўны цяжар, — падкрэсліла Людміла Пракоф’еўна,— ускладзены менавіта на паштальёнаў з сяла, якія, як мы называем, з’яўляюцца пунктамі крокавай дастаўкі. Акрамя пенсій, перыёдыкі яны дастаўляюць састарэлым грамадзянам тавары народнага спажывання па іх заяўках.
У галіне паштовай сувязі працуюць людзі, улюбёныя ў сваю справу. У многіх назапашаны значны вопыт, якім яны з задавальненнем дзеляцца з навічкамі.
Цёплых слоў заслугоўваюць нашы ветэраны В.Я.Міхалап, В.С.Дайнека, В.І.Сурыновіч і інш. На абласным сходзе, прысвечаным Сусветнаму дню пошты, калектыў Кіраўскага РВПС будзе прадстаўляць вопытны работнік, паштальён аддзялення сувязі Стайкі Н.П.Беразоўская».
Фота
Максіма МІКЕШЫНА.
На здымках: за работай — аператары гарадскога аддзялення паштовай сувязі Юлія Комар і Юлія Цярэнцьева; выгрузку паштовых адпраўленняў на транспарцёрную стужку вядзе аператар страхавога ўчастка Юлія Лізунова; рыхтуецца ў рэйс па раёне вадзіцель Мікалай Марцючэнка.