Для надзейнасці электразабеспячэння
22 снежня на планеце назіраецца самы кароткі светлавы дзень і самая доўгая ноч. Менавіта ў гэты дзень адзначаюць сваё прафесійнае свята энергетыкі — людзі, якія прыносяць святло ў наша штодзённае жыццё.У іх ліку — калектыў раёна электрасетак. Слова — яго кіраўніку Рыгору АЛДАШКІНУ:
—Бягучы год падыходзіць да свайго завяршэння, і ўжо можна гаварыць аб канкрэтных выніках. Трэба адзначыць, што ў сувязі з правядзеннем у нашым раёне абласнога фестывалю-кірмашу працаўнікоў вёскі “Дажынкі-2014” для электрыкаў былі значна павялічаны аб’ёмы работ.
Сёлета капітальна адрамантавана 94 км электрычных высакавольных ліній 10 кВ, 90 км — 0,4 кВ, а таксама 11 закрытых і 46 камплектных трансфарматарных падстанцый. Былі праведзены работы па касметычнаму рамонту фасадаў 6 трансфарматарных падстанцый у Кіраўску і а/г Мышкавічы. Значны аб’ём работ ажыццёўлены на Чыгірынскай ГЭС.
З пачатку года на электралініях напружанасцю 0,4 кВ у 332 спажыўцоў заменены ўводы на ізаляваныя, устаноўлена 7 пунктаў секцыянавання, 60 вынасных шафаў уліку на запланаваных лініях у адпаведнасці з планам мадэрнізацыі.
Пастаянна вялася мэтанакіраваная работа па абслугоўванні вулічнага асвятлення населеных пунктаў раёна. Сёлета ў а/г Мышкавічы дзеючыя свяцільні былі заменены на энергазберагаючыя, а таксама часткова кабельныя лініі вулічнага асвятлення.
Атрыманыя паказчыкі дасягнуты дзякуючы стараннай, адказнай працы прафесіяналаў сваёй справы: электраманцёраў раёна электрасетак Уладзіміра Лазаковіча і Ігара Ціхановіча, слесара Уладзіміра Садоўскага і дзяжурнага Аляксандра Сушчынскага з Чыгірынскай ГЭС.
З лепшага боку зарэкамендавалі сябе маладыя спецыялісты Валерый Барысёнак, Сяргей Рабаконь, Сяргей Леснікоўскі, Дзмітрый Хурсан, Яўген Пранцішаў — яны з адказнасцю ставяцца да выканання даведзенага задання.
Упэўнены, што і ў новым 2015 годзе вырашэнне вызначаных задач будзе калектыву раёна электрасетак па сілах.