Друкаваныя сродкі — на любы густ

conpany

Для паштовых аддзяленняў, грамадскіх распаўсюджвальнікаў і паштальёнаў снежань — “гарачы” месяц: падпісная кампанія на 2015 год у самым разгары. У тым, каб яна прайшла плённа, зацікаўлены ўсе: і паштовыя аддзяленні, і рэдакцыі газет і часопісаў. Зразумела, што ў сучасны век распаўсюджвання інфармацыйных тэхналогій кожны друкаваны сродак імкнецца да таго, каб захаваць свайго чытача, не знізіць тыраж, заставацца цікавым і запатрабаваным. А для гэтага трэба прыкладаць сур’ёзныя намаганні.
Самы значны груз адказнасці падчас правя-дзення падпісной кампаніі кладзецца на плечы паштальёнаў. Пенсіянеры, напрыклад, толькі праз іх і падпісваюцца на перыядычныя выданні. Па-першае — гэта зручна, нікуды не трэба хадзіць, паштальён завітае прама дадому, а па-другое — пры неабходнасці дапаможа з’арыентавацца ў вялікай колькасці друкаваных сродкаў, параіць нешта цікавае.
Паштальён аддзялення паштовай сувязі а/г Мышкавічы Юлія Семянкова працуе тут з 2011 года. Кожную раніцу з вялізнай сумкай, напоўненай карэспандэнцыяй, спяшаецца яна да сваіх падпісчыкаў. У яе падначаленні а/г Мышкавічы, а гэта па працягласці — даволі значны ўчастак, за дзень даводзіцца пераадольваць не адзін кіламетр. Аднак, па словах жанчыны, работа ёй у радасць, прыемна адчуваць, што цябе з нецярпеннем чакаюць, просяць нешта параіць.
Вось і зараз, падчас правядзення падпісной кампаніі, Юлія Семянкова з задавальненнем дапамагае сваім падпісчыкам вызначыцца з тым ці іншым сродкам інфармацыі, параіць цікавае і недарагое.
Па стане на ўчарашні дзень, на яе ўчастку ўжо выпісана больш за 100 экземпляраў газет і часопісаў. Найбольшай папулярнасцю карыстаюцца “Советская Белоруссия”, “Магілёўскія ведамасці” і вядома ж, “Кіравец”.
Сярод даўніх сяброў “раёнкі” — і былы настаўнік фізвыхавання і абслугоўваючай працы Мышкавіцкай СШ Ніна Скудная (на здымку).
Людміла СЯМЁНАВА.

Добавить комментарий

Ваш адрес email не будет опубликован.