Няпросты зараз перыяд у рабоце паштальёнаў: з кожным днём набірае абароты падпісная кампанія. І менавіта ад гэтых людзей у многім залежыць, якому выданню аддадуць перавагу падпісчыкі. А выбар сёння ў прыхільнікаў друкаваных СМІ — вялікі: у каталагу РУП “Белпошта” прадстаўлена больш за 1000 назваў беларускіх выданняў і каля 6000 — замежных газет і часопісаў.
Па словах загадчыка аддзялення паштовай сувязі а/г Баравіца Галіны Парфёнавай, ужо не першы год найбольшая колькасць іх падпісчыкаў аддае перавагу раённай газеце “Кіравец” і выпісваюць не адзін дзесятак гадоў. Не сакрэт, што ў многіх сем’ях — гэта адзіная друкаваная крыніца інфармавання. На жаль, з кожным годам змяншаецца колькасць сельскіх жыхароў, але работнікі паштовага аддзялення імкнуцца выконваць даведзеныя ім планавыя заданні.
Больш за 26 гадоў працуе ў аддзяленні паштальёнам Еўдакія Міхалап (на здымку). Абслугоўвае яна Баравіцу і Мазураўку. Па словах жанчыны, вяскоўцы з задавальненнем выпісваюць і чытаюць «Кіравец», з яго даведваюцца аб жыцці, дзейнасці і дасягненнях працоўных калектываў раёна і яго жыхарах. Папулярнасцю ў вяскоўцаў карыстаюцца таксама многія рэспубліканскія і абласныя выданні.
Да сваёй работы Еўдакія Пятроўна, як гаворыцца, прыкіпела душой. Ёй падабаецца сустракацца з людзьмі, дапамагаць ім і словам, і справай: адных трэба падбадзёрыць, іншым — паспачуваць, з трэцімі разам парадавацца. Самае прыемнае ў яе прафесіі, як кажа паштальён, адчуванне патрэбнасці людзям: іншы пажылы чалавек цэлы дзень сядзіць у хаце адзін, а як толькі яна завітвае на парог — шчыра радуецца яе прыходу. І такія моманты ў жыцці даюць запал бадзёрасці і шчырае жаданне працаваць для людзей.
Людміла СЯМЁНАВА.