І зноў — у прызавой тройцы
У мінулыя выхадныя дні ў Клімавічах прайшла абласная спартакіяда сярод раёнаў, холдзінгаў, аб’яднанняў, арганізацый і кіраўнікоў аграпрамысловага комплексу. Яна была пятай па ліку: дагэтуль былі дзве зімовыя і дзве летнія, у тым ліку і на базе нашага раёна. Падчас урачыстага адкрыцця спаборніцтваў на галоўнай плошчы горада пад сцягамі спартыўнага свята выстраіліся звыш 700 удзельнікаў, многія з іх ужо не першы год прымаюць удзел у спартакіядзе. Сярод іх была дружная каманда Кіраўскага раёна. Сёлетнія спаборніцтвы прысвячаліся 70-годдзю Вялікай Перамогі.
Дождж, які пайшоў у суботу раніцай і “змыў” апошнія надзеі на лыжныя гонкі і эстафету, не знізіў напал заўзятасці і не парушыў баявы дух каманд. Узняць настрой падчас урачыстага адкрыцця спаборніцтваў ім дапамаглі юныя самадзейныя артысты на чале з працавітай залатой пчолкай, “зляцеўшай” на свята з герба горада.
“Захапіць ідэяй здаровага ладу жыцця як можна большую колькасць яго прыхільнікаў — галоўны арыенцір, — адзначыў першы намеснік старшыні аблвыканкама, старшыня камітэта па сель-скай гаспадарцы і харчаванні Алег Чыкіда. — Бо менавіта заняткі фізкультурай і спортам садзейнічаюць умацаванню здароўя грамадзян, асабліва маладых людзей. Вельмі прыемна, што іх нямала сярод удзельнікаў спаборніцтваў. Важным момантам у арганізацыі і правядзенні насельніцтвам масавага актыўнага вольнага часу ў рэгіёнах пад дэвізам “У здаровым целе — здаровы дух” з’яўляецца прафілактыка захворванняў, выкараненне шэрагу шкодных звычак. Усё гэта станоўча ўплывае на якасць жыцця сяльчан, прадукцыйнасць іх працы, а ў канчатковым выніку — на эканамічнае развіццё аграпрамысловага комплексу”.
Затым пад гукі спартыўнага марша “Алімпійскі” агонь спаборніцтваў запаліў за-служаны трэнер Беларусі, ганаровы грамадзянін Клімаўшчыны Віктар Шапараў.
Падчас спартакіяды адначасова былі за-дзейнічаны некалькі спартыўных пляцовак. І на ўсіх — у ціры, басейне альбо на валейбольнай пляцоўцы — разгарнулася напружаная барацьба за высокія рэзультаты.
Прадстаўнікі Кіраўшчыны паказалі нядрэнныя вынікі як у камандным, так і ў індывідуальным заліках. Каманда нашага раёна ў чарговы раз увайшла ў тройку лідараў: па выніках спабор-ніцтваў з 28 каманд вобласці нашай прысуджана трэцяе месца.
У гіравым спорце ў розных вагавых катэгорыях выступалі выкладчык Жыліцкага сельгаскаледжа Міхаіл Міхайлюк (звыш 90 кг) і муляр ПМК-255 Віктар Бялянаў (да 90 кг) — у камандным заліку яны занялі 1-е месца. Дарэчы, Міхаіл Міхайлюк быў прызнаны і лепшым сярод іншых удзельнікаў у індывідуальным заліку.
Дзякуючы выдатнай гульні Яўгена Лашкевіча (заатэхніка СВК “Добасна-агра) і Марыі Васілеўскай (інструктара ЛФК санаторыя імя К.П.Арлоўскага) па настольным тэнісе ў нашай каманды зноў было 1-е месца!
Трэцяе месца ў спаборніцтвах па дартсе заваяваў начальнік аддзела ідэалагічнай работы СВК “Рассвет” імя К.П.Арлоўскага Яўген Пішчалін.
Фінансавую падтрымку ў падрыхтоўцы каманды раёна да спартакіяды аказалі СВК “Добасна-агра” і “Калгас “Беларусь”.
Спаборніцтвы праходзілі ў напружаным рытме, пры выдатным настроі. І тое, што наша каманда зноў у ліку лепшых, сведчыць аб належнай фізічнай падрыхтоўцы ўсіх яе удзельнікаў, жаданні ў далейшым удасканальваць свае дасягненні. Дарэчы, да летніх спаборніцтваў засталося не так ужо шмат часу. Таму тыя станоўчыя эмоцыі і запал бадзёрасці, якія атрымалі ўдзельнікі, падштурхнуць іх да атрымання высокіх рэзультатаў у чарговай спартакіядзе, якая пройдзе летам у суседнім Клічаве.
Віктар СТАВЕР,
старшыня райкама прафсаюза
работнікаў АПК.