“Афганістан, ты — боль маёй душы…”

miting

У мінулую пятніцу ў Цэнтры вольнага часу г.Кіраўска адбылося ўрачыстае мерапрыемства, прымеркаванае да 26-й гадавіны вываду савецкіх войск з Афганістана — сюды сабраліся ветэраны вайны ў Афганістане, удзельнікі іншых лакальных канфліктаў, іх родныя і блізкія, прадстаўнікі раённай улады, дэлегацыі працоўных калектываў, члены раённай арганізацыі грамадскага аб’яднання “Беларускі саюз ветэранаў воінаў-інтэрнацыяналістаў”, прадстаўнікі грамадскіх арганізацый і аб’яднанняў, моладзь. 

У фае ўстановы культуры ўвазе прысутных была прадстаўлена тэматычная выстава “Афганістан, ты — боль маёй душы…”
Прысутныя ў зале з трапятаннем у сэрцах слухалі вядучых, якія адзначылі, што маладыя рабяты з Кіраўшчыны выканалі свой інтэрнацыянальны абавязак на афганскай зямлі: выбар паміж жыццём і смерцю вызначаў для іх не толькі ваенны загад, але і пачуццё гонару. І сёння ў іх душах, не згасаючы, жывуць боль і горыч вайны, успаміны аб моцным мужчынскім сяброўстве і баявых таварышах, якія назаўсёды засталіся маладымі.
На экране — кадры вайны ў Афганістане, партрэты загінуўшых землякоў, салдацкія пісьмы…
Да ўдзельнікаў мерапрыемства звярнуўся старшыня райвыканкама Аляксандр Бутараў. Ён, у прыватнасці, адзначыў, што праз пекла вайны, якая зацягнулася амаль на 10 доўгіх гадоў, у далёкай усходняй краіне прайшлі каля 30 тысяч ураджэнцаў Беларусі, з іх 82 — жыхары Кіраўшчыны. За стойкасць і мужнасць, праяўленыя пры выкананні інтэрнацыянальнага абавязку, 7 нашых землякоў удастоены ордэна Чырвонай Зоркі, трое з іх — пасмяротна. Баявы шлях 16 нашых землякоў адзначаны медалямі.

Далей кіраўнік раёна падкрэсліў, што афган-ская вайна ўвайшла ў гісторыю як трагедыя ХХ стагоддзя, забраўшая тысячы жыццяў маладых рабят. Памяць аб той вайне па-ранейшаму болем адгукаецца ў сэрцах маці, бацькоў, удоў, дзяцей тых рабят, якія вярталіся дадому грузам “200”. Подзвіг, здзейснены ў імя міру і спакою на зямлі, сёння застаецца трывалым маральным фундаментам у патрыятычным выхаванні моладзі на баявых традыцыях старэйшага пакалення.
Старшыня райвыканкама таксама выказаў словы ўдзячнасці воінам-інтэрнацыяналістам за мужнасць, гераізм, вернасць воінскай прысязе, якія яны праявілі ў далёкай краіне, калі выконвалі свой абавязак перад дзяржавай, пажадаў ім здароўя, сямейнай цеплыні, дабрабыту на нашай беларускай зямлі.
Старшыня раённай арганізацыі грамадскага аб’яднання “Беларускі саюз ветэранаў вайны ў Афганістане” Юрый Сафронаў у сваёй прамове адзначыў, што выйшла ў свет кніга «Чужая вайна» аб кіраўчанах, прыняўшых удзел у лакальных канфліктах. Ініцыятыву актывістаў грамадскага аб’яднання па стварэнні гістарычнай хронікі на аснове даследавання розных дакументаў з асабістых архіваў воінаў-інтэрнацыяналістаў, публікацый у розных перыядычных выданнях, успамінаў удзельнікаў і відавочцаў ваенных дзеянняў у Афганістане і іншых падзей адобрыў былы старшыня райвыканкама Уладзімір Піскіжаў, а фінансавую падтрымку аказаў раённы выканаўчы камітэт. Гэта кніга стане сімвалам памяці і павагі да землякоў, якія дастойна выканалі свой воінскі абавязак.
На сцэну былі запрошаны актывісты раённай арганізацыі ГА “Беларускі саюз ветэранаў вайны ў Афганістане” — кожнаму з іх старшыня райвыканкама Аляксандр Бутараў уручыў кнігу “Чужая вайна”. Выданне атрымалі ўсе прысутныя ў зале воіны-інтэрнацыяналісты, а таксама тыя, хто меў дачыненне да яе выдання.
Ад імя маладога пакалення слова трымала вучаніца СШ №1 Яўгенія Касцючэнка. Яна нагадала, што тыя рабяты, якія выконвалі свой грамадзянскі абавязак у далёкай краіне, былі крыху старэйшымі за іх цяперашніх. І яны, не задумваючыся, працягнулі руку дапамогі іншаму народу, праявілі мужнасць і гераізм. Дзяўчына таксама падкрэсліла, што вайна і жыццё — не сумяшчальныя, адзначыла, што людзі павінны “зачахліць пушкі, расчахліць душы”.
Затым у памяць аб загінуўшых воінах-інтэрнацыяналістах у залу былі ўнесены запаленыя лампадкі.
Далей удзельнікі мерапрыемства прайшлі да памятнага знака воінам-інтэрнацыяналістам, якія выконвалі свой абавязак пры ліквідацыі лакальных канфліктаў, мінутай маўчання ўшанавалі памяць тых, хто выконваў інтэрнацыянальны абавязак і не вярнуўся жывым з той вайны. Старшыня райвыканкама Аляксандр Бутараў і старшыня раённага Савета дэпутатаў Надзея Каранкевіч усклалі кошык памяці, а прысутныя — кветкі і вянкі.
У многіх воінаў-інтэрнацыяналістаў на вачах блішчэлі слёзы: сёння разам з імі няма многіх баявых таварышаў, таму ім трэба жыць і за іх.
Па традыцыі група з ліку воінаў-інтэрнацыяналіс-таў, прадстаўнікоў улады і моладзі ўшанавала памяць загінуўшых воінаў-інтэрнацыяналістаў, ус-клала кветкі і вянкі на ма-гілы Пятра Петрусевіча і Віктара Шумілава ў Гарадцы, Аляксандра Ядлоўскага — у Жылічах. Яны таксама наведалі сям’ю Сяргея Макаранкі, які з гонарам выканаў свой інтэрнацыянальны абавязак, уратаваўшыся ад смерці, але, якога, на жаль, няма ўжо сярод жывых.
Таццяна БАРАДЗІНА.
Фота
Максіма МІКЕШЫНА.

Добавить комментарий

Ваш адрес email не будет опубликован.