Мы будзем праслаўляць цябе, наш родны край!
12 лютага, у дзень нараджэння Кіраўскага раёна, цэнтральная плошча горада ў адно імгненне ператварылася ў вялізную канцэртную пляцоўку. Справа ў тым, што ў гэты дзень тут адбыўся флэшмоб (Flash mob — у перакладзе з англійскай мовы “ўспышка натоўпу”) — такой акцыяй маладое пакаленне Кіраўшчыны вырашыла павіншаваць з юбілеем сваю малую радзіму.
Пад гукі музыкі з розных бакоў на плошчу збеглася вялікая колькасць юнакоў і дзяўчат з рознакаляровымі шарамі ў руках і дружна выстраілася ў слова “КІРАЎСК”.
Гэтае прыгожае відовішча прыцягнула ўвагу многіх кіраўчан. Людзі назіралі за цікавым і незвычайным дзействам, і на іх тварах з’яўляліся ўсмешкі.
Юнакі і дзяўчаты, тым часам, шчыра пакляліся, што куды б ні накіраваў іх лёс, яны заўсёды і ўсюды будуць памятаць і праслаўляць сваю родную Кіраўшчыну. А потым пад чароўныя гукі музыкі ў неба ўзмыла прымацаваная да паветраных шароў лічба “80”. Рабяты праводзілі яе поглядам і ўсе разам з упэўненасцю пракрычалі: “Кіраўска лепей няма!”