Выкарыстанню земляў — пільную ўвагу
Землеўпарадкавальная служба — адна са старэйшых у краіне. За гады існавання яна неаднойчы рэарганізоўвалася, але асноўныя яе функцыі застаюцца нязменнымі. Служба праводзіць адзі-ную дзяржаўную палітыку ў сферы землеўпарадкавання і зямельнага кадастру, ажыццяўляе рэгуляванне ў вобласці зямельных адносін, аховы і эфектыўнага выкарыстання земляў на тэрыторыі раёна, кантроль за правядзеннем і якасцю землеўпарадкавальных, зямельна-кадастравых работ. Значная ўвага надаецца разгляду матэрыялаў па адабранні і прадастаўленні зямельных участкаў, праверцы захавання фізічнымі і юрыдычнымі асобамі, заканадаўства аб ахове і выкарыстанні земляў.
Асаблівая ўвага надаецца пры вядзенні балансу ўліку земляў на тэрыторыі раёна, іх якаснай ацэнцы. Зямля павінна апрацоўвацца і даваць аддачу. Летась былі праведзены 273 праверкі захавання зямельнага заканадаўства, па выяўленні невыкарыстоўваемых зямельных участкаў, па іх выніках выдадзена 69 прадпісанняў аб ухіленні парушэнняў зямельнага заканадаўства, складзена 45 пратаколаў і пастаноў аб адміністрацыйных правапарушэннях і накладзены адміністрацыйныя спагнанні.
У ходзе праведзенай інвентарызацыі зямельных участкаў на тэрыторыях Паўлавіцкага, Стайкаўскага, Скрыпліцкага і Дабаснянскага сельсаветаў было выяўлена 43 га невыкарыстоўваемых плошчаў і перададзена сельгасарганізацыям.
Па выніках праверак выкарыстання зямельных участкаў у садаводчых таварыствах было адабрана 10 га незапатрабаваных плошчаў СТ “Прыазёрнае” і перададзена ў землі запасу раёна, выдадзена 45 прадпісанняў, састаўлены 3 пастановы аб накладанні адміністрацыйнага пакарання.
Адзначаны парушэнні зямельнага заканадаўства сярод сялянскіх (фермерскіх) гаспадарак: з 16 правераных СФГ у адной адабраны зямельны ўчастак плошчай 11 га і перададзены ранейшаму карыстальніку, выдадзена 5 прадпісанняў для ўхілення недахопаў.
На працягу 2014 года абследаваліся землі запасу райвыканкама, якія можна выкарыстоўваць для вядзення лясной гаспадаркі. У выніку было ўстаноўлена 1,7 тыс. га плошчаў, якія прылягаюць да земляў дзяржаўнага ляснога фонду і зараслі драўляна-кустарнікавай расліннасцю.
Наша дзейнасць звязана непасрэдна з людзьмі, таму ўкараненне ў практыку работы прынцыпу “адно акно” прыносіць свой плён. Грамадзяніну дастаткова падаць патрэбную заяву, а пасля нашага выкліку забраць гатовыя дакументы. Гэта садзейнічае таму, што няма нараканняў з боку наведвальнікаў у наш адрас.
Спецыялісты землеўпарадкавальнай службы працуюць у цесным кантакце з сельвыканкамамі, сельгасарганізацыямі, сумесна кантралююць пытанні рацыянальнага выкарыстання земляў. У ходзе прыёму жыхароў сельскіх населеных пунктаў даюць кансультацыі па афармленні і рэгістрацыі правоў на зямельныя ўчасткі, нагадваюць аб адказнасці за самавольны захоп участкаў.
У мінулым годзе ў землеўпарадкавальную службу паступіла звыш 900 зваротаў па пытаннях землеўпарадкавання. Амаль усе яны вырашаны станоўча.
Відавочна, што работнікі нашай службы павінны быць не проста прафесіяналамі, але любіць зямлю і справу, якой служаць. Менавіта такія якасці ўласцівы нашаму невялікаму, але дружнаму і зладжанаму калектыву. Наведвальнікі могуць звярнуцца да любога з чатырох супрацоўнікаў за парадай як па рабоце, так і пры вырашэнні асабістых пытанняў.
Людміла ШКРАБАВА,
начальнік
землеўпарадкавальнай службы райвыканкама.