У клопатах пра будучы ўраджай

kashko pusta1

Шырокім фронтам працягваюцца палявыя работы ў самай буйной гаспадарцы раёна — СВК “Рассвет” імя К.П.Арлоўскага: гэта сяўба кукурузы, высадка капусты, хімічная апрацоўка пасеваў шматгадовых культур ад шкоднікаў і пустазелля, падрыхтоўка глебы пад паўторную сяўбу аднагадовых культур на корм жывёле.
У бягучым годзе рассветаўцам неабходна было засеяць збожжавымі і зернебабовымі культурамі 1535 га. У сувязі з тым, што некаторыя ўчасткі азімых пшаніцы і рапсу былі пашкоджаны з-за неспрыяльных пагодных умоў у зімова-веснавы перыяд, павялічыліся аб’ёмы работ.
Значную ўвагу ў гаспадарцы надаюць вырошчванню кукурузы. Зараз актыўнымі тэмпамі вядзецца сяўба “каралевы палёў”, пад яе адведзена 3150 га, з якіх 950 га будзе ўбрана на зерне, 2200 га — на сілас, а таксама на бесперапыннае забеспячэнне работы біягазавай устаноўкі. На раніцу ўчарашняга дня сяўбу кукурузы на зерне ў гаспадарцы ўжо завяршылі.
У мінулым годзе ў сельгаскааператыве сабралі 4197 т зерня кукурузы і 73500 т зялёнай масы, у бягучым плануюць павялічыць ураджай. І для гэтага робіцца ўсё неабходнае: захоўваюцца тэхналагічныя працэсы падрыхтоўкі глебы і правядзення сяўбы, у наяўнасці насенны матэрыял высокай якасці. Выкарыстоўваецца насенне гатункаў, якія зарэкамендавалі сябе добрымі ўраджаямі ў папярэднія гады.
Па словах начальніка ўчастка “Кірава” Ігара Шчэрбіча, нягледзячы на тое, што аб’ёмы пасяўных плошчаў кукурузы вялікія, працавітасць і адказнасць земляробаў дазваляюць справіцца з заданнем у найкарацейшыя тэрміны. Агранізаваны кругласутачны рэжым работы. Амаль па 30 га за змену паспяваюць засяваць Віталь Кашкоў, Юрый Каранкевіч, Іван Кавалеўскі і Мікалай Бандарэнка. Не сакрэт, што добрыя ўраджаі ў значнай ступені залежаць ад якасна падрыхтаванай глебы. Таму і даверылі гэты ўчастак работы вопытным механізатарам Мікалаю Белакурскаму, Дзмітрыю Кахновічу, Мікалаю Дразду і Сяргею Кахновічу.
На здымках: Віталь Кашко заняты на сяўбе кукурузы; вядзецца пасадка капусты.

bel1 ivanov1 piloty

Займаецца “Рассвет” і вырошчваннем агародніны. Чакаюць спрыяльнага надвор’я 417 га бульбы, 40 га цыбулі, 15 га морквы, 29 га сталовых буракоў. Зараз у гаспадарцы прыступілі да высадкі капусты. Пад гэтую культуру адвялі 20 га сельгаспалеткаў на вытворчым участку “Валосавічы”. Расаду позняй капусты гатунку “фальтэр” у гаспадарцы вырошчвалі самі, таму паклапаціліся, каб расліны былі развітыя, з моцнай каранёвай сістэмай, што дазволіць атрымаць увосень значны ўраджай качаноў.
На высадцы капусты задзейнічана 15 паляводаў. Яны акуратна змя-шчаюць расаду ў пасадачную машыну і сочаць за якасцю працэса высадкі. За дзень тут паспяваюць высадзіць расліны на 1,5 га. А для таго, каб яны пайшлі ў рост, у глебу быў унесены неабходны комплекс угнаенняў.
На падвозцы расады шчыруе Леанід Прохараў, вопытны і адказны вадзіцель , таму і даверылі яму дастаўляць на палеткі крохкую расаду.
Майскае надвор’е спрыяе росту не толькі культурных раслін, але і пустазелля. Таму, вельмі важна не прапусціць аптымальныя тэрміны хімпраполкі сельгаскультур. У гаспадарцы з гэтымі работамі спраўляюцца своечасова, зараз асаблівая ўвага — абароне раслін ад шкоднікаў і хвароб. Значную дапамогу пры правядзенні такіх работ рассветаўцам аказвае сельгасавіяцыя. Менавіта з дапамогай самалётаў сельгаскааператыў адным з першых у раёне пачынае падкормку раслін. Дарэчы, менавіта выкарыстанне паветранай тэхнікі дазваляе рассветаўцам у сціслыя тэрміны і на значных плошчах праводзіць комплекс сельгасработ, прычым, не траўміруючы расліны.
Не за гарамі ўжо і пачатак “зялёнага жніва”. Зараз механізатары вядуць перадвыязную праверку і даводзяць да ладу агрэгаты, якія будуць забяспечваць грамадскі статак сакавітымі кармамі.
Не сціхае гул тэхнікі на палетках сельгаскааператыва ні днём, ні ўначы: шчыруюць механізатары, клапоцяцца пра будучы ўраджай. Якім ён будзе, сказаць пакуль складана, але відавочна, што рассветаўцы заслугоўваюць шчодрых ніў.
Людміла
СЯМЁНАВА.
Фота
Максіма
МІКЕШЫНА.
На здымках: механізатар Іван Бяляўскі; галоўны пілот, камандзір лётнага звяна самалёта АН-2 Валерый Іваноў; пілот Уладзімір Анішчанка і механік Мікалай Папкоў.

Добавить комментарий

Ваш адрес email не будет опубликован.