На ўрачыстай цырымоніі ўзнагароджвання работнікаў друкаваных і электронных СМІ, прысвечанай Дню друку і Дню работнікаў радыё, тэлебачання і сувязі, якая прайшла на мінулым тыдні ў Палацы культуры вобласці, прагучалі і імёны прадстаўнікоў рэдакцыі “Кіраўца”.

Як адзначыў падчас адкрыцця цырымоніі старшыня Магілёўскага абласнога Савета дэпутатаў Анатоль Ісачанка, сродкі масавай інфармацыі з’яўляюцца летапісцамі сучаснай гісторыі. “Слова журналіста найбольш значнае ў год 70-годдзя Вялікай Перамогі, — пад-крэсліў ён. — СМІ бесперапынна вярстаюць летапіс сучаснасці для будучых пакаленняў, ім давяраюць мільёны людзей. Та-му вельмі важна, каб па старонках газет, радыё- і тэле-эфірах чырвонай ніткай праходзіла тэма патрыятызму і шчырай любові да Радзімы”.
Па словах Анатоля Ісачанкі, СМІ — гэта не проста крыніцы навін, гэта актыўныя дыскусійныя пляцоўкі, публікатары думак і пунктаў погляду, разнастайнасць якіх садзейнічае эфектыўнай рэалізацыі доўгатэрміновых праграм сацыяльнага і эканамічнага развіцця нашага рэгіёна. “Забяспечваючы грамадства аб’ектыўнай, усебаковай і аператыўнай інфармацыяй, журналісты ні на хвіліну не забываюць аб сваёй высокай сацыяльнай місіі — дапамагаць людзям знаходзіць адказы на самыя вострыя і актуальныя пытанні сучаснасці,”— падкрэсліў старшыня абласнога Савета дэпутатаў.
На ўрачыстым мерапрыемстве былі адзначаны пераможцы і прызёры абласнога спаборніцтва сярод рэдакцый дзяржаўных газет і журналістаў за 2014 год.
Фотакарэспандэнту “Кіраўца” Максіму Мікешыну прысу-джана трэцяе месца сярод фотакарэспандэнтаў, ён быў удастоены дыплома аблвыканкама, грашовай прэміі, атрымаў каштоўны падарунак.
Ганаровай граматай галоўнага ўпраўлення ідэалагічнай работы, культуры і па справах моладзі аблвыканкама была ўзнагароджана галоўны рэдактар установы “Рэдакцыя раённай газеты “Кіравец” Наталля Хадакова за шматгадовую добрасумленную працу ў сродках масавай інфармацыі, высокі прафесіяналізм, значны асабісты ўклад у развіццё раённай газеты.
Журналістаў і работнікаў паліграфіі ўшанавалі прадстаўнікі абласной і гарадской улады, абласнога і гарадскога Саветаў дэпутатаў, УУС аблвыканкама, Следчага камітэта, МНС, БРСМ, прафсаюзаў, абласной ветэранскай арганізацыі.
На здымку: старшыня абласнога Савета дэпутатаў Анатоль Ісачанка ўручае ўзнагароды фотакарэспандэнту «Кіраўца» Максіму Мікешыну.