Кіраўскія сандружыны паказалі належныя веды і згуртаванасць

oborona oborona2 oborona3 oborona4 oborona5

Грамадзянская абарона з’яўляецца адной з важнейшых функцый дзяржавы, састаўной часткай абароннага будаўніцтва і забеспячэння бяспекі краіны. У апошнія гады, калі ў свеце ўсё часцей адбываюцца стыхійныя бедствы, аварыі, пажары, катастрофы, дзейнасць сістэмы грамадзянскай абароны набывае асаблівую актуальнасць. Грамадзянскія фарміраванні – санітарныя звёны і дружыны, аддзяленні пажаратушэння – павінны мець пастаянную высокую ступень гатоўнасці, каб своечасова папярэджваць і аказваць дапамогу насельніцтву ў надзвычайных сітуацыях. Адсюль вынікае і адна з важнейшых задач грамадзянскай абароны – навучанне грамадзян правілам дзеянняў у экстрэмальнай сітуацыі.

П раверыць ступень гатоўнасці санітарных звёнаў, дружын і супрацьпажарных грамадзянскіх фарміраванняў да дзеянняў у экстрэмальных сітуацыях і былі закліканы спаборніцтвы ў рамках традыцыйнага раённага Дня грамадзянскай абароны, які прайшоў на падрыхтаванай пляцоўцы каля возера “Селішча”.
Дзевяць каманд прадпрыемстваў, устаноў, арганізацый раёна спрачаліся за першынство на трох асноўных этапах: пажарная эстафета, баявое разгортванне на вадападаючай тэхніцы і спаборніцтвы санітарных звёнаў і дружын.
На ўрачыстым пастраенні ўдзельнікаў вітаў намеснік старшыні райвыканкама Вячаслаў Нявінскі.
Каб спаборніцтвы прайшлі зладжана і арганізавана, пастараліся супрацоўнікі РАНС, якія з самай раніцы падрыхтавалі пляцоўку, устанавілі неабходнае абсталяванне. Райспажыўтаварыства забяспечыла работу выязной гандлёвай кропкі, дзе можна было набыць ахалоджаныя напіткі і марожанае.
Праходзілі спаборніцтвы ў паралельным фармаце: мужчыны ў поўнай пажарнай амуніцыі дэманстравалі сілу, вынослівасць і мужнасць пры праходжанні камбінаванай эстафеты і па меткасці пападання струменем вады з брансбойта па ўмоўнай цэлі, жанчыны змагаліся за званне самых дасведчаных знаўцаў дзеянняў у ачагу паражэння. Апошнім неабходна было пераадолець пяць асноўных этапаў: на першым правяралася аснашчэнне – наяўнасць сумак з поўнай спецыяльнай укладкай медыцынскіх сродкаў згодна пераліку, на другім этапе выяўлялася ўменне карыстацца сродкамі індывідуальнай абароны, трэці этап уяўляў сабой камбінаваны ачаг паражэння, і чацвёрты – этап хімічнага паражэння, а пяты – бактэрыялагічнага.
На кожным з этапаў веды і навыкі сандружынніц ацэньвалі строгія суддзі – работнікі райбальніцы. Так, па выніках праходжання кожнай з частак налічваліся штрафныя балы. Каманда, у якой аказалася менш штрафных ачкоў, і станавілася лідарам.
Высокую ступень гатоўнасці, належныя веды і ўменне прадэманстравалі сандружынніцы з СВК “Рассвет” імя К.П.Арлоўскага, якія і занялі першае месца. На другім месцы – санітарная дружына СВК “Калгас “Беларусь”, на трэцім – ААТ “Кіраўскае райаграпрамтэхзабеспячэнне”.
Пры праходжанні пажарнай эстафеты ў тройцы лідараў былі каманды СВК “Рассвет” імя К.П.Арлоўскага, СВК “Калгас “Ніва” і РАПТЗ.
У спаборніцтвах па баявым разгортванні прыстасаванай вадападаючай тэхнікі лепшымі сталі каманды КСУП “Жылічы”, СВК “Рассвет” імя К.П.Арлоўскага і СВК “Калгас “Ніва”.
Сярод санітарных звёнаў не было роўных прадстаўніцам ліцэя №15, другое месца дасталася ААТ “ПМК-97 “Вадгас”, трэцяе – СГФ “Чыгірынка”.
Ірына Бабіч.

Добавить комментарий

Ваш адрес email не будет опубликован.