Задача дня — кармы высокай якасці

belokerrr

Зладжана, арганізавана праходзіць “зялёнае жніво” ў СВК “Рассвет” імя К.П.Арлоўскага. Увесь светлавы дзень на яго палетках не змаўкае гул сельгастэхнікі: корманарыхтоўшчыкі імкнуцца забяспечыць бесперапынную работу зялёнага канвеера.
Нарыхтоўка кармоў у гаспадарцы наладжана адразу на некалькіх участках. Аснашчанасць сучаснай і магутнай корманарыхтоўчай тэхнікай дазваляе весці касавіцу аператыўна. Прапусціць тэрміны скошвання – страціць карысныя якасці траў і не атрымаць высакаякасныя кармы. Памятаюць аб гэтым у гаспадарцы не толькі спецыялісты, але і працаўнікі палёў, у чыіх руках сёння будучыя надоі малака і прыбаўкі ў вазе буйной рагатай жывёлы.

У бягучым годзе “Рассвету” прадстаіць нарыхтаваць 41 тыс. т сенажу, 3 тыс. т сена і 42600 т — сіласнай масы.
Рабочы дзень у механізатараў на касьбе пачынаецца рана, а заканчваецца познім вечарам. Усяго рассветаўцам неабходна скасіць травы першым укосам на 2554 га, па стане на ўчарашні дзень гэтыя работы праведзены на 961 га, убраны травы на 700 га: з якіх зялёная маса з 232 га пайшла на корм жывёле, на сянаж — з 457 га і на сена — з 15 га.
Першымі вывелі на сенажаці трактары з касілкамі Мікалай Белакурскі, Міхаіл Букаты, Іван Салановіч, Аляксандр Кандрацьеў, Ігар Несцяровіч. З пастаўленай перад імі задачай механізатары спраўляюцца выдатна, бо для кожнага з іх касавіца — справа звыклая, удзень звяно паспявае скасіць каля 90-100 га. Эстафету зялёнага канвеера прымаюць у іх механізатары Сяргей Дрозд і Віктар Зайцаў, якія працуюць на варушылцы і граблях. На прэсаванні сена заняты Іван Бяляўскі. Вопытныя і адказныя працаўнікі Міхаіл Вербенка і Канстанцін Пятруша шчыруюць на кормаўборачных камбайнах, затрымкі за імі няма: іх тэхніка добра падрыхтавана і працуе без збояў, а пад’язджаючыя аўтамабілі імгненна напаўняюцца здрабнёнай “зялёнкай”. Хутка дастаўляюць зялёную масу да сянажных траншэй і на корм жывёле Мікалай Бандарэнка, Сяргей Шчэрбіч, Дзмітрый Кахновіч, Аляксандр Гутараў і Дзяніс Аўсянік.
Вельмі адказны ўчастак — закладка і трамбоўка сянажных траншэй: дрэнна ўтрамбаваны ці не адпавядаючы па тэмпературных і вільготных рэжымах сянаж, замест якасных кармоў можа ператварыцца ў непрыдатную для кармлення жывёлы гніль. Належную ўвагу надаюць у “Рассвеце” пажыўнасці сенажу, для чаго выкарыстоўваюць кансерванты. Кантралююць працэс нарыхтоўкі і закладкі сянажнай масы адказныя спецыялісты, вядзецца ўся неабходная дакументацыя. Сянажныя траншэі былі своечасова падрыхтаваны для прыёму зялёнай масы: ачышчаны ад рэшткаў кармоў, пабелены, пад’езды высланы саломай. Працуюць на закладцы і трамбоўцы сенажу Мікалай Дрозд і Фёдар Кукабака: абодва ў гаспадарцы на добрым рахунку, добрасумленныя і адказныя. Трамбоўка сянажнай масы вядзецца кругласутачна.
У сваю чаргу і кіраўніцтва гаспадаркі праяўляе клопат аб працаўніках: усе забяспечаны спецвопраткай, сродкамі індывідуальнай аховы, прама на палеткі дастаўляюцца гарачыя і смачныя абеды. Распрацаваны меры маральнага і матэрыяльнага заахвочання за якаснае правядзенне корманарыхтоўкі.
Усё гэта дае ўпэўненасць, што на прадстаячую зімоўку для грамадскага статка ў “Рассвеце” будуцьмець дастатковую колькасць кармоў выдатнай якасці.
Людміла
СЯМЁНАВА.
Фота
Максіма
МІКЕШЫНА.

Добавить комментарий

Ваш адрес email не будет опубликован.