Гісторыя Паветрана-дэсантных войскаў вядзе свой пачатак з 2 жніўня 1930 г. — у гэты дзень на вучэннях ВПС Маскоўскай ваеннай акругі было выкінута на парашутах падраздзяленне дэсантнікаў у саставе 12 чалавек. Гэты эксперымент дазволіў ваенным тэарэтыкам убачыць перспектыву перавагі парашутна-дэсантных часцей, іх велізарныя магчымасці.
Пачатак стварэнню масавых паветрана-дэсантных войскаў паклала пастанова Рэвваенсавета СССР, якая была прынята 11 снежня 1932 года.
Дзень дэсантнікаў — свята, якое цяжка не заўважыць. Нават той, хто ніколі не служыў у ПДВ, прайшоўшы па вуліцах горада, адразу прыгадае, што сёння – 2 жніўня, дзень, калі людзі ў цяльняшках і блакітных берэтах адзначаюць чарговую гадавіну паветрана-дэсантных войскаў.
Для кіраўчаніна Васіля Рублеўскага гэта памятны і значны ў жыцці дзень.
У 1979 г. ён быў прызваны ў рады Савецкай Арміі, праходзіў службу ў вучэбным падраздзяленні ў Гайджунах у Латвіі. Менавіта там ён прайшоў “хрышчэнне небам”: ажыццявіў свой першы скачок з парашутам.
У студзені 1980 года Васіль Рублеўскі быў накіраваны для далейшага праходжання службы ў Афганістан. Свой воінскі абавязак ён выканаў дастойна: сярод яго ўзнагарод — медаль “За адвагу” і Ганаровая грамата Вярхоўнага Савета СССР.
Заслугоўвае павагай і яго працоўны шлях: шмат гадоў Васіль Міхайлавіч добрасумленна шчыруе слесарам у цэху паліўнай апаратуры РАПТЗ.
Сённяшні абаронца Айчыны Віталь Фралоў з аг.Барчыцы праходзіць службу ў 139-й гвардзейскай асобнай мабільнай брыгадзе г.Віцебска. З дзяцінства юнак марыў аб службе ў элітных войсках, а прыкладам для яго быў старэйшы брат Сяргей, які праходзіў службу ва ўнутраных войсках МУС. Зараз ён з гонарам выконвае свой воінскі абавязак, з’яўляючыся дастойным прадстаўніком братэрства дэсантнікаў.