У Кіраўскім раёне павіншавалі хлебаробаў з высокімі працоўнымі паказчыкамі

nagradymysk

На гэтым тыдні ў аўторак першым у раёне экіпажам збожжа-ўборачнага камбайна, які дасягнуў тысячнага рубяжа па намалотах, стаў экіпаж у саставе Івана Салановіча і Івана Багеля з СВК “Рассвет” імя К.П.Арлоўскага.
У мінулую сераду на рассветаўскія сельскагаспадарчыя палеткі завіталі першы намеснік старшыні райвыканкама, начальнік упраўлення сельскай гаспадаркі і харчавання Аляксандр Адамаў, старшыня райкама прафсаюза работнікаў АПК Віктар Ставер, першы сакратар райкама ГА “БРСМ” Алена Осіпава, а таксама старшыня СВК “Рассвет” імя К.П.Арлоўскага Аляксандр Багель, каб павіншаваць хлебаробаў з высокімі працоўнымі паказчыкамі і ўручыць ім заслужаныя ўзнагароды (на здымку).

На момант нашага прыезду сельскагаспадарчая тэхніка працавала на полі каля аг.Мышкавічы. Прыпыніўшыся на хвіліну, залюбаваліся тым, як магутная тэхніка з лёгкасцю ўразалася ў збожжа, абмалочваючы спелае калоссе, як залатым дажджом зерне сыпалася ў кузаў аўтамабіля. Магчыма, вось гэтыя моманты і перапаўняюць радасцю сэрцы тых, хто старанна працуе на ўраджай…
Уручаючы камбайнерам Івану Салановічу і Івану Багелю заслужаныя ўзнагароды, Аляксандр Адамаў падзякаваў ім за старанную працу і пажадаў далейшых працоўных дасягненняў. Плённая праца хлебаробаў была таксама адзначана грашовымі прэміямі і Падзячнымі лістамі ад райкама прафсаюза работнікаў АПК, якія ўручыў Віктар Ставер. Свае віншаванні выказаў і старшыня СВК “Рассвет” імя К.П.Арлоўскага Аляксандр Багель, уручыўшы камбайнерам-“тысячнікам” грашовыя прэміі.
У мінулым нумары “раёнка” паведамляла аб першых у раёне “тысячніках” сярод вадзіцеляў, занятых на адвозцы збожжа ад камбайнаў: гэта Андрэй Храпянкоў з СВК “Калгас “Ніва” і Дзяніс Сакабіцкі з СВК “Рассвет” імя К.П.Арлоўскага. Яны ў гэты дзень таксама былі адзначаны ўзнагародамі.
Малады вадзіцель Дзяніс Сакабіцкі, атрымаў ад райкама ГА “БРСМ” каштоўны падарунак і Падзячны ліст.
Віншаванні і каштоўныя падарункі за добрасумленную працу і дасягненне высокіх працоўных паказчыкаў атрымаў у гэты дзень і малады вадзіцель Андрэй Храпянкоў.
Ірына БАБІЧ.
Фота Максіма МІКЕШЫНА.

Добавить комментарий

Ваш адрес email не будет опубликован.