З мэтай прыцягнення дзяцей і падлеткаў да заняткаў фізкультурай і спортам, фарміравання навыкаў здаровага ладу жыцця, прывіцця любові да фізічнай актыўнасці праз папулярызацыю такога віду спорту як лёгкая атлетыка, у 2015 годзе ўпершыню ў рэспубліцы праводзіліся спаборніцтвы “Шкаліяда” сярод вучняў 3-4 класаў. Праходзілі яны ў чатыры этапы: ва ўстановах адукацыі, раённыя, абласныя і рэспубліканскія. Кожны юны спартсмен спаборнічаў у наступных дысцыплінах: скачок у даўжыню з месца, кіданне мяча, бег на 30 метраў, бег на 800 метраў (хлопчыкі) і 500 метраў (дзяўчынкі).

Паспяхова прайшоўшы першы і другі этапы “Шкаліяды”, вучаніца 4 класа  гімназіі Дар’я Гаршкова заняла 7 месца ў вобласці. Добры ўзровень падрыхтоўкі прадэманстраваў на абласным этапе і вучань 3 класа гімназіі Уладзіслаў Гаўрылаў: 27 месца. Але гэтага выніку было недастаткова, каб увайсці ў зборную вобласці.

Дар’я ж прыняла ўдзел у рэспубліканскім этапе спаборніцтваў і атрымала сертыфікат фіналіста, што дазволіла ёй прыняць удзел у заключным этапе лёгкаатлетычнага спартыўна-масавага мерапрыемства «300 талентаў для Каралевы», які праходзіў 25-26 снежня ў Мінску.

Дадому  дзяўчынка вярнулася не толькі з каштоўнымі і салодкімі падарункамі, дыпломам Беларускай федэрацыі легкай атлетыкі і медалём Рэспубліканскага цэнтра фізічнага выхавання і спорту вучняў і студэнтаў, але і з добрымі ўражаннямі і настроем, а таксама яшчэ з большым жаданнем перамагаць на спартыўных пляцоўках.

І нават калі Дар’я і іншыя мае вучні не стануць вялікімі спартсменамі, упэўнена, удзел у падобных мера-прыемствах дапаможа ім стаць больш моцнымі, настойлівымі і працавітымі.

Алена АКУЛІЧ, настаўнік фізічнай культуры і здароўя гімназіі г.Кіраўска.