Паказалі выдатную гульню
Кіраўчанка Веалета Бяляўская разам з бабруйчанкай Анастасіяй Цітковай прадстаўлялі нашу вобласць на першынстве Рэспублікі Беларусь па пляжным валейболе сярод дзяўчат 2000-2001 г.н. Спартсменкі паказалі зладжаную гульню, і ў выніку — 2-е месца!
Як адзначыў трэнер-выкладчык ДЮСШ Сяргей Лазаковіч, у Маладзечна сабраліся 16 каманд, якія былі падзелены на 4 групы. Зборная Магілёўскай вобласці ў сваёй групе абыграла каманду Мінска (2:1) і Гомеля (2:0), але з лікам 0:2 уступіла гродзенцам.
Затым былі гульні на выбыванне, і зноў нашы дзяўчаты былі на вышыні — з лікам 2:1, як і ў першым туры, у напружанай барацьбе перамаглі мінчанак.
У чвэрцьфінале дружны тандэм Магілёўшчыны абыграў каманду Салігорска (2:0). І зноў — чарговая перамога над мінчанкамі: з лікам 2:1 (у трэці раз!) у паўфінале Веалета і Анастасія святкавалі перамогу.
У фінале нашы дзяўчаты сустрэліся з прадстаўніцамі г.Гродна. На жаль, з лікам 0:2 яны ім уступілі пры невялікім разрыве мячоў (21:16, 21:19).
Кіраўчанка Веалета Бяляўская ў чарговы раз прадэманстравала свае майстэрства, напорыстасць і выпрацаваную тактыку. Падчас гульняў яна сабраная, і ў яе заўсёды ёсць жаданне перамагчы.
Мы ганарымся сваёй спартсменкай, няхай і надалей ёй спадарожнічае ўдача!