Шэраг сустрэч у працоўных калектывах раёна правёў на мінулым тыдні дэпутат Палаты прадстаўнікоў Нацыянальнага сходу Рэспублікі Беларусь Ігар Кананчук.
Ён меў гутарку з работнікамі раённага цэнтра сацыяльнага абслугоўвання насельніцтва, райспажыўтаварыства, гімназіі горада. Асноўная тэма — рэалізацыя норм Дэкрэта №3 “Аб папярэджванні сацыяльнага ўтрыманства”.

Дэпутат нагадаў, што падчас рабочай паездкі ў Магілёўскую вобласць 21 сакавіка Прэзі-дэнт Беларусі А.Р.Лукашэнка ў чарговы раз падкрэсліў, што Дэкрэт №3 не адмянялі і не прыпынялі, ён дзейнічае, толькі прыпынены выплаты на фінансаванне дзяржрасходаў на гэты год: паколькі паведамленні аб уплаце былі высланы на месцах каму трэба і каму не, скрупулёзна вывяраюцца ўсе спісы.
Як адзначыў Ігар Кананчук, Дэкрэт будзе дапрацаваны, будуць унесены пэўныя змены, у тым ліку і згодна прапаноў з рэгіёнаў. Вельмі важна больш актыўна праводзіць растлумачальную работу сярод грамадзян, каб давесці да іх ведама ўсе нюансы норм указанага дакумента.
А ўвогуле, падкрэсліў дэпутат, усе працаздольныя людзі павінны ўдзельнічаць у фінансаванні дзяржрасходаў. Усе карыстаюцца паслугамі галін аховы здароўя, адукацыі, адрамантаванымі дарогамі, для ўсіх забяспечваецца грамадская бяспека, а на гэта і іншыя мэты ідуць значныя бюджэтныя сродкі, і несправядліва, калі адны плацяць падаткі, а другія не.
Ігар Паўлавіч коратка праінфармаваў аб рабоце Палаты прадстаўнікоў Нацыянальнага сходу Рэспублікі Беларусь і, у прыватнасці, Пастаяннай камісіі па аграрнай палітыцы, у састаў якой ён уваходзіць. У кампетэнцыі камісіі — пытанні аграрнай палітыкі і аграпрамысловага комплексу, заканадаўства аб сельскай гаспадарцы і нарыхтоўцы сельгаспрадукцыі, заканадаўства аб ахове і выкарыстанні земляў, пытанні развіцця сацыяльнай інфраструктуры сельскіх населеных пунктаў.
Вялікую ўвагу надаюць дэпутаты рабоце ў акругах: сустрэчы з выбаршчыкамі дазваляюць даведацца аб становішчы спраў у рэгіёне, праблемах, якія хвалююць людзей, дапамагчы ў іх вырашэнні, зразумела, у межах заканадаўства.
Працягваючы тэму рэалізацыі норм Дэкрэта №3, намеснік старшыні райвыканкама Таццяна Бяляўская падчас сустрэчы ў РЦСАН закранула пытанне правядзення падворных абходаў на вёсцы і ў горадзе, падчас якіх высвятляецца жыццёвая сітуацыя кожнага чалавека, які трапіў у спіс асоб, абавязаных уплачваць збор на фінансаванне дзяржрасходаў. Высветлілася, што не ўсе грамадзяне ведаюць, што маюць падставы для вызвалення (поўнасцю або часткова) ад уплаты збору. Не ўсе звяртаюцца ў камісію па разгляду зваротаў грамадзян, прэтэндуючых на атрыманне льгот па ўплаце рэспубліканскіх падаткаў, збораў (пошлін), поўнасцю або часткова ўплачваемых у раённы бюджэт.
Таццяна Бяляўская заклікала прысутных, калі ў іх ёсць родныя, блізкія, знаёмыя, якія ў адпаведнасці з Дэкрэтам №3 трапілі ў спісы так званых “утрымальнікаў”, паспрыяць паскарэнню іх звароту ў райвыканкам для разгляду жыццёвых сітуацый. Яна прывяла прыклады сітуацый, якія прымаюцца да ўвагі, кожная з іх разглядаецца ўважліва і дэталёва.
Намеснік старшыні райвыканкама расказала таксама аб вырашэнні пытанняў занятасці ў раёне.
Наталля ХАДАКОВА.
Фота
Максіма МІКЕШЫНА.
На здымку: падчас сустрэчы ў РЦСАН.