Яшчэ спрабуюць станавіцца на шляху веснавой калясніцы рознага роду цыклоны — спыніць яе рух ім ужо не па сілах. Пасля даволі нечаканага пятнічнага мокрага снегу і дажджу чарговы пагодны дзянёк панаваў ўчора на Кіраўшчыне!

…Рэдакцыйная “легкавушка” накіравалася ў бок Барчыц. Мэта супрацоўнікаў “раёнкі” — пацікавіцца ходам веснавых палявых работ у КСУП “Барчыцы-агра”. Літаральна на ўсіх прылягаючых да сельгаспрадпрыемства палетках работы вяліся планамерна і без мітусні.

Справа перад Барчыцамі яшчэ здалёк было відаць трактар, які імкліва рухаўся ўздоўж дарогі, цягнучы за сабой сельгасагрэгат. Ішоў шпарка, імкліва, нібыта невялікі катэр разразаў гладзь мора… І толькі калі машына падышла да дарогі блізка, перад намі вырас магутны “Беларус-3022” з нарошчанымі дадатковымі шырокімі коламі і аб’ёмнай сеялкай 6-мятровага захопу. А вось і рулявы, убачыўшы нас, на непрацяглы час ён пакінуў кабіну, каб пагутарыць. Гэта наш даўні знаёмы Генадзь Волас — перадавы механізатар гаспадаркі, неаднаразовы лаўрэат раённых спаборніцтваў у розных намінацыях. Каторы сезон даручае яму кіраўніцтва сельгаспрадпрыемства самыя адказныя ўчасткі работ на мясцовых палях і ўпэўнена, што ўсе пастаўленыя задачы будуць выкананы і ў аптымальныя тэрміны, і якасна.

— Дзесяць год таму, — расказвае Генадзь Аляксандравіч, — засяваў палі з дапамогай лёгкай пнеўматычнай сеялкі СПУ-6. Час не стаіць на месцы: вось ужо некалькі сезонаў прычапляю яшчэ больш удасканалены агрэгат. За светлавы дзень удаецца засяваць каля 50 га. Можна было б і крыху болей, але пакуль не на ўсіх палях суха — нямала “акенцаў”, дзе стаіць вада. Давядзецца вяртацца да іх крыху пазней…

— Калі дажджоў не будзе, то і “акенцы” засеюцца хутка, — гэта ўключыўся ў размову Валерый Каліноўскі, які дзяжурыць цэлы дзень каля сеялкі. Ветэран мехцэху, ён ў маладосці шчыраваў яшчэ ў былым некалі саўгасе “50 год БССР”. Зараз забяспечвае соечасовую дастаўку і загрузку насення. — На гэтым участку будзе яравая пшаніца. Па дзве ёмістасці запраўшчыка зараз хапае на дзень для напаўнення пасяўнога агрэгата. Працуем з самага ранку і да цямна. Перапынкі — толькі на абед і вячэру. Дарэчы, гарачае харчаванне, прыгатаване ў сталовай гаспадаркі, дастаўляюць нам прама ў поле…

Звяртаем увагу на левы бок ад дарогі на Барчыцы. Тут завіхаюцца адразу два трактары. На абодвух закрываецца вільгаць у глебе і рыхтуюцца новыя ўчасткі пад будучую ў хуткім часе сяўбу. На магутным МТЗ-3022 апрацоўвае поле Міхаіл Салянкін. На больш лёгкім “Беларусу-920” забараноўвае глебу Сяргей Фралоў. Апошні — адзін з прадстаўнікоў самага маладога пакалення механізатараў. Працуе толькі два гады, але сваёй шчырасцю спаўна заваяваў давер кіраўніцтва.

Дарэчы, Сяргей пайшоў па слядах бацькі, Юрыя Міхайлавіча, які даўно працуе ў гэтай жа гаспадарцы. Зараз вопытны механізатар уносіць арганіку разам з напарнікам Аляксеем Мацвіенкам. На пагрузцы ўгнаенняў на “Амкадоры” заняты Валерый Чабатар. У сельгаспрадпрыемстве поўнасцю выкананы план па вывазцы арганікі, зараз глебу ўгнойваць пад яравую сяўбу.

Наступны ўчастак, дзе актыўная вядуцца работы, — поле за Барчыцамі ў бок Хвайніцы. Тут вядзе ворыва яшчэ адзін малады механізатар Ігар Гаўрылюк. Кіруючы трактарам МТЗ-1502 з 5-корпусным плугам, механізатар пакідае за сабой роўную гладзь ўзаранага поля. Днямі яму ў дапамогу плануюць у  накіраваць яшчэ адну адзінку: працаваць побач будзе Аляксандр Смалоўскі.

Веснавыя работы ў сельгаспрадпрыемстве набралі абароты. Але і зрабіць трэба яшчэ шмат. Як расказаў галоўны аграном КСУП “Барчыцы-агра” Руслан Ядчанка, мясцовым працаўнікам бягучай вясной патрэбна засеяць яравымі збожжавымі і зернебабовымі 614 га. У плане таксама 500 га кукурузы на зялёную масу, 100 га рапсу, 70 га цукровых буракоў. Для сяўбы гэтых культур частка насення ўжо нарыхтавана, і ў гэтыя дні актыўна вырашаецца пытанне з забеспячэннем насення пад поўную патрэбу. У арганізацыі работ, адзначыў галоўны тэхнолаг палёў, у гаспадарцы ўсё наладжана належным чынам. Галоўны патэнцыял — гэта кадры, якімі забяспечаны ў поўнай меры. Ёсць вопытныя працаўнікі, якія не падвядуць, іх уменню і працавітасці вучацца больш маладыя. Гэты сплаў дае свой плён.

Аляксандр ХАХЛОЎ.

Фота аўтара.