Старанна працуюць на ўборцы кукурузы механізатары Канстанцін Пятруша, Андрэй Казакоў, Мікалай Белакурскі, Максім Акуліч. 

За рулём “Джон Дзіра” — Віталь Кашкоў

Якасна ўзворвае глебу Аляксандр Міхалькоў

Вядзецца ўборка сталовых буракоў

Садавод Наталля Малашонак

Важкі ўраджай сакавітай прадукцыі

Вольныя хвіліны для земляробаў — справа рэдкая ў гэтыя восеньскія дні. Адна работа змяняе другую, а за ёй — яшчэ… Дажджы крыху “прытармазілі” тэмп палявых работ кіраўскіх сельгасвытворцаў, але тыя ніколькі не былі пад­уладныя надвор’ю: землеробы максі­мальна выкарыстоў­ваюць кожную пагодную хвіліну, бо яшчэ не ўвесь ураджай сабраны.
Сапраўдным калейдаскопам выглядаюць у гэтыя вераснёўскія дні дзеянні працаўнікоў ААТ “Рассвет імя К.П.Арлоўскага”. На абшарах сельгаставарыства шырокім фронтам працягваюць разгортвацца работы. Напрыканцы мінулага тыдня мы наведалі розныя рассветаўскія ўчасткі, і паўсюль назіраліся высокая арганізацыя працы, тэмпы і, безумоўна, выдатнае стаўленне саміх рассветаўцаў да работ.
Яшчэ ў апошнія дні жніўня распачалі ў “Рассвеце” ўборку кукурузы на сілас. “Каралева палёў” выдалася на славу: своечасова апрацаваная і падкормленая, яна налілася ў поўнай меры. За в.Суянец падчас нашага прыезду на полі працаваў механізаваны атрад. Кормакамбайны даручылі маладым механізатарам, якія, між тым, далёка не навічкі на палявых работах.

На здымках: на ўборцы кукурузы старанна працуюць — Віталь Кашкоў (уверсе) і Канстанцін Пятруша (першы злева ўнізе), а Андрэй Казакоў, Мікалай Белакурскі і Максім Акуліч займаюцца адвозкай зялёнай масы.

На “Нью Холанд” выдатна працуе Канстанцін Пятруша. Ён ужо сёлета паспеў неаднаразова трапіць у лік лідараў — і на сяўбе, і на жніве, і вось цяпер таксама задае тон. Разам з ім абжынае кукурузныя палеткі на “Джон Дзір” Віталь Кашкоў. Гэта 5-ты сезон камбайнера на корманарыхтоўцы. Дагэтуль ён выдатна працаваў на пагрузчыку, а цяперашнюю машыну, нібыта эстафету, атрымаў ад Уладзіміра Асоса — вядомага рассветаўскага перадавіка мінулых гадоў. “Цяпер не магу планку зніжаць, — з усмешкай кажа пераемнік. — На гэтай машыне “біліся” рэкорды. Трэба і мне таксама імкнуцца да найлепшых рэзультатаў!..”. Да слова, разам з яшчэ адным перадавіком-рассветаўцам Міхаілам Вербенкам, Віталь ударна сёлета працаваў на нарыхтоўцы сенажу: уся закладзеная маса ў “Рассвеце” прайшла праз іх камбайны…
Як нам паведамілі ў райсельгасхарчы, на ўчарашнюю раніцу ў сельгаставарыстве ўбралі кукурузу на 523 га, сярэдняя ўраджайнасць — 321 т. Атрымана 16812 т зялёнай масы, з якой 15423 т закладзена ў сіласныя траншэі, астатняе — пайшло на падкормку жывёле.
Пад магутнымі жаткамі спелая кукуруза ператвараецца ў сакавітую масу. Адзін за адным грузавікі і трактары з прычэпамі займаюць месцы пад стрэ­ламі кормакамбайна. Знаёмыя асобы: Мікалай Белакурскі, Валерый Шчэрбіч, Міхаіл Букаты, Сяргей Іваніцкі, Андрэй Казакоў, Максім Акуліч, Іван Новікаў… Толькі, здаецца, учора шчыравалі яны на жніве і іншых работах, а зараз імкліва дастаўляюць свежаскошаную духмяную кукурузную масу да сіласных траншэй.
За Цейкавічамі — наступныя клопаты рассветаўцаў. Тут на адным з участкаў былі размешчаны пасевы сталовых буракоў. Як нам расказаў адказны за гэтае поле аграном Іван Фядотаў, сюды дастаўляюць работнікаў з розных падраздзяленняў “Рассвета”, умацоўвае “армію” яшчэ і ўпраўленне па працы, занятасці і сацыяльнай абароне райвыканкама, адкуль накіроўваюцца сезонныя работнікі. Па 60-70 чалавек штодзень працуюць на ўборцы чырвоных буракоў. Караняплоды сёлета займалі 17 га. Больш за палову агульнымі намаганнямі выкапаны, укамплектаваны ў спецыяльную тару і дастаўлены на захоўванне. Крыху пазней буракі будуць адсартыраваны і паступяць у гандлёвую сетку.
Наогул агароднінаводства — ні для каго не сакрэт — адна з візітных картак “Рассвета”. Ужо пачалі тут уборку капусты і цыбулі. На чарзе — морква. Ураджай з рассветаўскіх палёў знойдзе свайго пакупніка.
…Праз Цейкавічы накіроў­ваемся ў Валосавічы. Фруктовы сад, які раскінуўся на 220 га, нельга не заўва­жыць, а, тым больш, наліўныя плады, якія важкімі гронкамі звісаюць з галін маладых дрэўцаў. Тут актыўна вядзецца ўборка спелых яблык. Садавод Наталля Малашонак правяла невялікі экскурс у мясцовы “эдэм”:
— Плады ранніх гатункаў — яблыкаў і груш — убралі яшчэ раней — па меры іх саспявання. У прыватнасці, яблыкі гатункаў “белы наліў”, “алена”, і “каваленкаўскі” паспяхова пайшлі ў рэалізацыю. Зараз здымаем больш поз­нія гатункі: “вяснянку” і “ауксіс”. Напера­дзе — яшчэ больш познія — “алеся”, “імант”, “зорка”. Сакавітыя плады рассветаўскага сада, знятыя з дрэў, накіроўваюцца ў сховішча — іх час настане крыху пазней, калі яны, прайшоўшы свой шлях, лягуць на прылаўкі гандлёвых кропак.
Як адзначыла кіраўнік рассветаўскага падраздзялення “Сад” Алена Юркавец, для сёлетняга важкага ўра­джаю папрацавала шмат людзей, і задзейнічаны былі самыя сучасныя тэхналогіі. З убраных амаль 44 га сада атрымана 289 т
пладоў. Добрых слоў заслужылі сваёй працай садаводы Алеся Барысёнак, Наталля Вербенка. Выдатна спраўляецца з абавязкамі камбайнер па ўборцы пладоў Аляксей Бяляўскі. Не было б паспяховага збору яблык і груш без штодзённага кантролю агранома Аляксандра Іваніцкага — сёлетні ўраджай у многім і яго заслуга…
Кіпіць работа і за Валосавічамі. Думкі рассветаўцаў — пра будучы ўраджай. У дзень нашага наведвання ў свежую глебу клалася насенне азімай пшаніцы. Загадзя пасля сёлетняй уборкі падрыхтавалі і падкармілі глебу, падабралі папярэднікі. А таксама — і надзейных сейбітаў: Мікалай Дрозд, які яшчэ нядаўна шчыраваў на жніве, засявае палеткі ўдзень. Яго напарнік — Дзмітрый Кахновіч — займае месца ў кабіне трактара ўноч. Кругласутачна не спыняецца рухавік іх “Джон Дзіра”, а, як рэзультат — усё больш і больш засеяных пло­шчаў, якія плануюць рассветаўцы ператварыць у будучыя важкія намалоты.
Аляксандр ХАХЛОЎ.
Фота аўтара.