Кіраўчане прынялі ўдзел у форуме маладых спецыялістаў у Магілёўскім раёне
На мінулым тыдні на базе Магілёўскага дзяржаўнага прафесійнага агралесатэхнічнага каледжа імя К.П.Арлоўскага прайшоў форум маладых спецыялістаў, якія атрымалі ў бягучым годзе першае рабочае месца на Магілёўшчыне.
У Буйнічах сабраліся маладыя прадстаўнікі самых розных прафесій з розных куткоў Прыдняпроўскага краю. Чацвёра “новаспечаных” спецыялістаў прадстаўлялі Кіраўшчыну: інжынер па забеспячэнні ААТ “Рассвет імя К.П.Арлоўскага” Раман Шапавалаў, настаўнік харэаграфічных дысцыплін Жыліцкай дзіцячай школы мастацтваў Уладзіслава Ерына і ўрачы цэнтральнай райбальніцы — афтальмолаг Карына Нурматава і тэрапеўт Юлія Юхноўская.
Двухдзённая праграма форуму была насычанай. Напачатку ўдзельнікі пабывалі ў вучэбных аўдыторыях, лабараторыях, майстэрнях навучальнай ўстановы. Маладыя спецыялісты наведалі таксама музей пад адкрытым небам, дзе ім былі паказаны эпізоды гераічнай абароны Магілёва ад нямецка-фашысцкіх захопнікаў у гады Вялікай Айчыннай вайны.
У форме дзелавой і канструктыўнай размовы прайшло пленарнае пасяджэнне, удзел у якім прынялі старшыня Магілёўскага аблвыканкама Уладзімір Даманеўскі, памочнік Прэзідэнта Рэспублікі Беларусь, інспектар па Магілёўскай вобласці Генадзь Лаўранкоў, старшыня абласнога аб’яднання прафсаюзаў Дзмітрый Янкоў і інш.
Вітаючы ўдзельнікаў форуму, Уладзімір Даманеўскі адзначыў, што ў нашай краіне для моладзі робіцца многае. Малады спецыяліст мае права атрымаць першае рабочае месца. Гэта дарагога каштуе, бо ва ўмовах рыначнай эканомікі канкурэнцыя вытворцаў прыводзіць да канкурэнцыі спецыялістаў. У выйгрышы тут застаюцца больш вопытныя, найбольш падрыхтаваныя. Аднак палітыка нашага Прэзідэнта накіравана на тое, што моладзь павінна быць сацыяльна абаронена, і першае працоўнае месца для маладога спецыяліста можа стаць стартавай пляцоўкай для самастойнага жыцця. Замацаванне маладых кадраў, адзначыў губернатар, — гэта прыярытэтная задача для любога кіраўніка. І ад таго, наколькі правільна ён арганізуе работу на прадпрыемстве і ў арганізацыі, будзе залежаць вырашэнне праблемы замацавання маладых спецыялістаў і, як вынік, праблемы забяспечанасці кадрамі.
Шмат цікавай і карыснай інфармацыі ўдзельнікі атрымалі ад наступных выступаючых. Працоўнымі біяграфіямі падзяліліся вопытныя кіраўнікі: дырэктар Магілёўскага дзяржаўнага агралесатэхнічнага каледжа Георгій Маліноўскі, дырэктар КСУП “Саўгас “Дабраволец” Клічаўскага раёна Алег Портнік. Аб выхаванні ў сабе пачуцця адказнасці гаварыў малады кіраўнік КСУП “Аўсянка” Горацкага раёна Дзяніс Дземянкоў, які пераняў эстафету кіраўніцтва ад вядомага і паважанага ў краіне чалавека, Героя Сацыялістычнай Працы Івана Мельніка. Прамоўца выказаў падзяку за дапамогу ў станаўленні яго прафесійнай падрыхтоўкі і загартоўцы характару сённяшняму кіраўніку Кіраўскага раёна Аляксандру Бутараву, які ў свой час узначальваў упраўленне сельскай гаспадаркі і харчавання Горацкага райвыканкама. Аляксандр Бутараў, які таксама прымаў удзел у рабоце форуму, падзяліўся з яго ўдзельнікамі сваімі жыццёвымі прынцыпамі. Сённяшні кіраўнік Кіраўскай раённай вертыкалі таксама калісьці пачынаў працоўную біяграфію маладым спецыялістам.
Затым былі выступленні непасрэдна саміх маладых кадраў, якія падзяліліся ўражаннямі аб першых працоўных месцах. У фармаце адкрытага дыялогу Уладзімір Даманеўскі адказаў на шматлікі пытанні, хвалюючыя моладзь.
Не менш багатым па насычанасці і цікавасці быў і другі дзень форуму. Разбіўшыся на групы, удзельнікі актыўна працавалі па секцыях і ў працэсе творчай работы шмат што ўзялі для сябе на ўзбраенне. Вырашана падобныя мерапрыемствы, у ходзе якіх прадугледжаны абмен меркаваннямі і вопытам у розных накірунках дзейнасці, прадоўжыць надалей. Акрамя таго, у бліжэйшым будучым плануецца стварыць у рэгіёне савет маладых спецыялістаў.
Аляксандр ХАХЛОЎ.