Узнагарода за шматгадовую і добрасумленную працу
На адбыўшымся 3 студзеня пасяджэнні райвыканкама першы намеснік старшыні райвыканкама, начальнік райсельгасхарчу Іван Барташэвіч уручыў Ганаровую грамату райвыканкама начальніку фінансавага аддзела райвыканкама Галіне Шупікавай за шматгадовую добрасумленную працу ў органах дзяржаўнага кіравання, узорнае выкананне службовых абавязкаў, значны асабісты ўклад у рэалізацыю бюджэтна-фінансавай і падатковай палітыкі раёна, а таксама ў сувязі з 55-годдзем з дня нараджэння.
Г.Р.Шупікава нарадзілася ў Бялыніцкім раёне. Пасля заканчэння фінансава-эканамічнага тэхнікума ў г.Мінску жыццё і працоўная дзейнасць Галіны Рыгораўны непарыўна звязана з Кіраўшчынай. У 1995 годзе яна скончыла Беларускі дзяржаўны эканамічны ўніверсітэт.
Работу ў фінансавай галіне раёна пачала старшым рэвізорам-інспектарам па бюджэце фінансавага аддзела райвыканкама, на працягу 23 гадоў працавала тут жа на розных пасадах. У 2004 годзе Галіна Шупікава ўзначаліла фінансавы аддзел райвыканкама.
Кампетэнтны і высокакваліфікаваны спецыяліст, добрасумленна і адказна выконваючы свае службовыя абавязкі — такой ведаюць у раёне Г.Р.Шупікаву кіраўнікі арганізацый раёна, калегі па рабоце.