Таленавітыя дзеці — гонар бацькоў і навучальных устаноў, надзея Беларусі на далейшы росквіт і павышэнне іміджу краіны на міжнародным узроўні.

Наша дзяржава зацікаўлена, каб маладыя людзі пастаянна ўдасканальваліся, развіваліся. У межах гэтага ажыццяўляецца падтрымка таленавітай моладзі, ствараюцца ўмовы для рэалізацыі яе творчых магчымасцей. Існуе спецыяльны фонд Прэзідэнта Рэспублікі Беларусь па сацыяльнай падтрымцы адораных вучняў і студэнтаў.

Шмат адораных дяцей і на нашай кіраўскай зямлі. Сваёй стараннай вучобай, здольнасцямі ў музыцы і мастацтве, спартыўнымі дасягненнямі яны праслаўляюць сваю малую радзіму, адстойваюць гонар класа, школы, раёна, вобласці, рэспублікі.

Нямала такіх таленавітых рабят узрасціла багатая гісторыяй і падзеямі жыліцкая зямля. Гэты цудоўны куточак Кіраўшчыны, дзе знаходзіцца жамчужына нашага краю — Жыліцкі палацава-паркавы ансамбль з размешчанай у ім дзіцячай школай мастацтваў — дае пуцёўку ў чароўны свет мастацтва, прывівае любоў да культурнай спадчыны беларускага народа вялікай колькасці рабят. У сценах гэтай установы не змаўкаюць чароўныя гукі музыкі, звонкія дзіцячыя галасы, а яе выхаванцы становяцца ўдзельнікамі і пераможцамі конкурсаў і фестываляў самых розных узроўняў.

Багатым у культурным плане і значным на дасягненні для выхаванцаў Жыліцкай школы мастацтваў Тэоны Бебурыя з Добасны і Мацвея Пашкоўскага з Жыліч стаў мінулы год. Сярод іх дасягненняў — дыплом фіналістаў ІІІ Міжнароднага фестывалю-конкурсу “Новыя вяршыні”, лаурэатаў І ступені другога культурнага Міжнароднага праекта «LETOсябры», лаурэатаў ІІ ступені Міжнароднага творчага конкурсу “Мастацтва свету”, лаурэатаў ІІІ ступені другога Міжнароднага творчага інтэрнэт-конкурсу “Галерэя талентаў”. Таленавітыя музыканты прынялі ўдзел у канцэртным турнэ, праводзімым бельгійскай дабрачыннай асацыяцыяй “Адраджэнне і абнаўленне для дзяцей Чарнобыля”.

Праслаўляюць сваю малую радзіму трывалымі ведамі і іншыя вучні Жыліцкай СШ. Віталь Арлоўскі стаў уладальнікам трэцяй прэміі спецыяльнага фонду Прэзідэнта Рэспублікі Беларусь па сацыяльнай падтрымцы адораных вучняў і студэнтаў і ўнесены ў банк дадзеных адоранай моладзі Рэспублікі Беларусь, таксама юнак узнагароджаны дыпломам ІІІ ступені ў заключным этапе конкурса навуковых эколага-біялагічных работ навучэнцаў.

Дыпломам ІІ ступені рэспубліканскага конкурсу юных паэтаў і празаікаў “Слова ў пераплёце” ўзнагароджана Лізавета Арэшка. Таксама дзяўчына стала пераможцай раённага конкурсу “Выратавальнікі вачамі дзяцей”.