Старшыня райвыканкама Аляксандр Бутараў прыняў удзел у галасаванні на выбарах у мясцовыя Саветы дэпутатаў на Кіраўскім участку для галасавання  №3, размешчаным у сярэдняй школе №2 імя К.П.Арлоўскага. Сюды ён прыйшоў разам з жонкай Вольгай Міхайлаўнай і малодшым сынам Георгіем.

Кіраўнік раёна пацікавіўся ў старшыні ўчастковай выбарчай камісіі Алены Лянкевіч ходам галасавання. Тут яно праходзіла актыўна, выбаршчыкі ішлі адзін за адным, нават цэлымі сем’ямі.

Пасля таго, як Аляксандр Бутараў прагаласаваў, па просьбе журналістаў “Кіраўца” ён падзяліўся меркаваннямі пра тое, якімі якасцямі павінен валодаць дэпутат мясцовых Саветаў дэпутатаў, даў ацэнку арганізацыі выбарчай кампаніі ў раёне.

Кіраўнік раёна падкрэсліў, што выбары ў мясцовыя Саветы дэпутатаў — адна з важнейшых палітычных кампаній. “Мы выбіраем людзей, — адзначыў Аляксандр Бутараў, — якія павінны быць звязуючым звяном паміж насельніцтвам і органамі ўлады, сумесна з ёй удзельнічаць у вырашэнні праблемных пытанняў жыццезабеспячэння насельніцтва, у рабоце па іншых напрамках, каб жыццё грамадзян станавілася яшчэ больш камфортным.

Дэпутат павінен быць чалавекам нераўнадушным, актыўным, дзейным. У раёне ёсць шэраг праектаў, якія трэба рэалізоўваць, у тым ліку і з удзелам дэпутатаў”.

Старшыня райвыканкама таксама дадаў, што важная функцыя дэпутата — інфармаванне грамадзян па нормах заканадаўства, іншых пытаннях.

Выбарчая кампанія ў раёне, падкрэсліў Аляксандр Бутараў, праходзіць на належным арганізацыйным узроўні, у адпаведнасці з выбарчым заканадаўствам. На ўсіх 28 участках для галасавання створаны неабходныя ўмовы, участковыя камісіі працуюць дакладна і якасна.

Для выбаршчыкаў, якія па стане здароўя не могуць у дзень выбараў прыйсці ў памяшканне для галасавання, згодна іх зваротаў, наладжана галасаванне па месцы знаходжання. Арганізаваны гандаль, музычнае суправаджэнне. Зроблена ўсё, каб выбаршчыкі мелі магчымасць выканаць свой грамадзянскі абавязак, канстатаваў кіраўнік раёна.