З пачуццем гонару і адказнасці ставяцца да выбарчай кампаніі навучэнцы Жыліцкага сельгаскаледжа
У першы дзень датэрміновага галасавання на выбарах у мясцовыя Саветы дэпутатаў дваццаць восьмага склікання на Жыліцкім ўчастку для галасавання №17, які знаходзіцца ў сельгаскаледжы, выстраілася цэлая чарга — многія з навучэнцаў прыйшлі, каб аддаць голас на карысць аднаго з кандыдатаў ў дэпутаты.
Сярод моладзі адчувалася лёгкае хваляванне — некаторыя прыйшлі на ўчастак для галасавання, каб ўпершыню прыняць удзел у выбарах. Адны прыйшлі прагаласаваць датэрмінова, каб хутчэй адчуць усю значнасць гэтай падзеі, другія — таму, што на выхадныя паедуць дадому. У руках у хлопцаў і дзяўчат — пашпарты, адзін за адным яны падыходзілі да рэгістрацыі, атрымлівалі бюлетэні і накіроўваліся ў кабіну для галасавання, каб зрабіць свой выбар.
Да абеда тут прагаласавала 88 навучэнцаў і 65 мясцовых жыхароў — 16% выбаршчыкаў, якія уключаны ў спісы для галасавання (усяго 927 чалавек, 203 з іх — юнакі і дзяўчаты сельгаскаледжа).
Як адзначыў старшыня ўчастковай выбарчай камісіі Сяргей Арлоўскі, датэрміновае галасаванне ідзе актыўна і ў межах выбарчага заканадаўства. Загадзя на інфармацыйных гадзінах рабят пазнаёмілі з працэдурай галасавання, Выбарчым кодэксам Рэспублікі Беларусь. У навучальнай установе, інтэрнатах і СДК размешчаны стэнды з інфармацыяй пра кандыдатаў у дэпутаты мясцовых Саветаў дэпутатаў, аформлены “Куток маладога выбаршчыка”.
Мы папрасілі каледжаўцаў падзяліцца сваімі ўражаннямі, а таксама запыталі, якім, па іх меркаванні, павінен быць дэпутат:
Васіліна ГОЛУБЕВА, 2 курс:
— У выбарах я прымаю ўдзел ўпершыню, мне здаецца, што гэтая падзея надоўга застанецца ў маёй памяці. У маім разуменні, дэпутат павінен ведаць і імкнуцца вырашаць праблемы сваіх выбаршчыкаў, умець весці за сабой народ, быць упэўненым у сабе, мець аўтарытэт сярод сваіх калег і іншых людзей.
Ігар ЧАРТКОЎ, 2 курс:
— Вельмі хвалюючае пацуццё дачынення да такой падзеі, як выбары. Бо менавіта мы, моладзь, адказныя за сваю будучыню, выбіраючы чалавека, які падтрымае нашы інтарэсы. Чытаючы біяграфіі кандыдатаў, кожны можа меркаваць аб тым, якіх поглядаў і якой палітыкі ён будзе прытрымлівацца, у якіх пытаннях будзе разбірацца лепш за ўсё, да якой катэгорыі насельніцтва ён бліжэй.
Кацярына КАЗЛОЎСКАЯ, 3 курс:
— Вельмі добра, што ёсць магчымасць прагаласаваць датэрмінова, бо збіраюся на выхадных паехаць дадому. Сёння я прыйшла на ўчастак для галасавання, ужо ведаючы, за якога кандыдата ў дэпутаты мясцовых Саветаў дэпутатаў аддам свой голас. Удзел у выбарах — важны крок. Лічу, што кожны з прысутных тут сёння і наогул на выбарах бярэ на сябе адказнасць за фарміраванне органаў мясцовага самакіравання.
Юлія ЗАВІШАВА.
Фота Максіма МІКЕШЫНА.