Асноўны клопат — здароўе сяльчан — такі прафесійны дэвіз у загадчыцы Баравіцкага ФАПа Святланы Вараб’ёвай
Сярод калектываў фельчарска-акушэрскіх пунктаў пераможцай у спаборніцтве сярод галін народнай гаспадаркі раёна за 2017 год прызнаны калектыў Баравіцкага ФАПа ЦРБ.
Загадчыцай медыцынскай установы больш за 17 гадоў з’яўляецца Святлана Вараб’ёва. Дапамагаюць ёй медсястра Паліна Міронава і санітарка Святлана Сідарава. Гэты невялікі жаночы калектыў выдатна спраўляецца са сваімі абавязкамі, прадстаўляючы сяльчанам шырокі спектр медыцынскіх паслуг.
Родам Святлана Вараб’ёва з суседняга Скачка. Пасля заканчэння школы атрымала спецыяльнасць “лячэбная справа” ў Аршанскім медыцынскім вучылішчы. Вярнулася ў родныя мясціны, і з таго часу яна на варце аховы здароўя сяльчан.
Поле дзейнасці вясковага медыка, як вядома, дастаткова шырокае. На абслугоўванні ў калектыва Баравіцкага ФАПа 16 населеных пунктаў, дзе пражывае 1022 чалавекі.
Рабочы дзень Святланы Васільеўны заўсёды насычаны. Пасля прыёму хворых на ФАПе яна наведвае пацыентаў на даму. Пры падазрэнні на сур’ёзнае захворванне выклікае “хуткую дапамогу” або накіроўвае на прыём да ўрача ў райбальніцу. Рэгулярна на ФАП прыязджаюць ўрачы-спецыялісты, вядуць прыём хворых.
У абавязкі загадчыцы медустановы ўваходзіць забеспячэнне людзей неабходнымі лякарствамі, правядзенне прафілактычнай работы з насельніцтвам. Асаблівую ўвагу надае спецыяліст правільнаму фарміраванню і развіццю нованароджаных, сочыць за здароўем маленькіх жыхароў навакольных вёсак.
Падчас правядзення пасяўной і ўборачнай кампаній фельчар правярае стан здароўя механізатараў і вадзіцеляў перад іх выездам у поле.
Акрамя асноўнай сваёй дзейнасці Святлана Васільеўна заўсёды ў цэнтры грамадскага жыцця. Сёлета жанчына была абрана дэпутатам раённага Савета дэпутатаў дваццаць восьмага склікання. Мясцовыя выбаршчыкі ўжо ў трэці раз даверылі ёй прадстаўляць свае інтарэсы на раённым узроўні.
Як медык, Святлана Васільеўна прыкладае ўсе намаганні, каб захаваць здароўе сяльчан, а як дэпутат — імкнецца палепшыць жыццё на вёсцы, зрабіць яго больш камфортным. Асаблівы клопат — пра адзінокіх і адзінока пражываючых грамадзян, мнагадзетныя сем’і і інвалідаў. Разам з прадстаўнікамі мясцовай улады жанчына пастаянна ўдзельнічае ў падворных абходах населеных пунктаў, дапамагаючы людзям вырашаць іх жыццёвыя праблемы.
Але галоўнае прызванне любой жанчыны — сям’я, камфорт і ўтульнасць у доме, шчасце ў дзецях. У гэтым сэнсе Святлане Вараб’ёвай пашанцавала: яна любімая жонка, матуля і самая лепшая ў свеце бабуля. Разам з мужам Фёдарам Цімафеевічам выхавалі такіх жа працалюбівых, як і самі, сына і дачку. Цяпер яны прыязджаюць са сваімі сем’ямі ў бацькоўскі дом, каб не толькі адпачыць, але і дапамагчы, бо работы ў вёсцы заўсёды ўдосталь.
Самыя радасныя для Святланы Васільеўны моманты — калі ў доме збіраецца ўся іх вялікая сям’я. Жанчына заўсёды стараецца прыгатаваць для ўсіх нешта смачнае. А для траіх сваіх любімых унукаў Анюткі, Славіка і трохгадовай Дашанькі, абавязкова купляе салодкасці.
На пытанне, што для яе значыць шчасце, жанчына адказала вельмі проста — жыць і адчуваць сябе патрэбнай.
Людміла СЯМЁНАВА.