Стварыць належныя ўмовы для сяльчан: аб рабоце Баравіцкага сельскага Савета дэпутатаў
Па выніках раённага спаборніцтва сярод органаў мясцовага самакіравання першае месца прысуджана Баравіцкаму сельскаму Савету дэпутатаў. Аб дзейнасці сельвыканкама мы папрасілі расказаць яго страшыню Алену ПАШКЕВІЧ:
— Адным з асноўных накірункаў нашай работы ў мінулым годзе было добраўпарадкаванне тэрыторыі сельсавета. А яна – немалая, уключае ў сябе 26 вёсак, у якіх пражывае больш за 1600 чалавек.
У межах навядзення парадку на зямлі летась было знесена больш за 80 безгаспадарных дамоў і падмуркаў, уцягнута ў севазварот больш за 106 га пустуючых зямельных участкаў. Прывабны выгляд пасля праведзеных мерапрыемстваў па добраўпарадкаванні набылі вуліцы Саўгасная, Зарэчная, Школьная, Зорная, Лясная і Цэнтральная ў аг.Баравіца.
Пэўны час на тэрыторыі п.Скачок і аг.Баравіца існавала праблема сухіх і аварыйных дрэў пашкоджаных раслінай-паразітам “амелай”. Усяго было выяўлена больш за 200 такіх дрэў. Большасць з іх пасля абследавання спецыялістамі УКП “Жылкамгас” былі спілаваны, некаторые краніраваны. А ўсяго было спілена 572 дрэвы. Работа ў дадзеным накірунку будзе працягвацца і ў далейшым.
Але для таго, каб нашы вёскі з ранняй вясны і да позняй восені патаналі ў зеляніне дрэў, сёлета падчас правядзення раённага суботніка па вул.Цэнтральнай аг.Баравіца быў закладзены парк: высаджана каля 420 маладых дрэўцаў. Актыўны ўдзел ў работах прынялі арганізацыі, размешчаныя на тэрыторыі сельсавета, мясцовыя школьнікі і жыхары.
На пастаянным кантролі сельвыканкама таксама знаходзіцца работа па прафілактыцы злачынстваў і правапарушэнняў, п’янства і алкагалізму сярод жыхароў сельсавета. Яе вынікі разглядаюцца і абмяркоўваюцца на пасяджэннях Савета грамадскага пункта аховы правапарадку. Падчас іх правядзення аналізуецца стан злачыннасці ў сельсавеце, абмяркоўваюцца дзеянні па прадухіленні пажараў і гібелі людзей ад іх, выкананні патрабаванняў Дэкрэта №18 “Аб дадатковых мерах па дзяржаўнай абароне дзяцей у няўдачных сем’ях”, праца з сем’ямі, дзе дзеці знаходзяцца ў сацыяльна небяспечным становішчы, і абавязанымі асобамі, разглядаюцца персанальныя справы жыхароў сельсавета, якія вядуць асацыяльны лад жыцця.
Сведчаннем плённай работы нашага Савета ГПАП стаў дыплом ІІІ ступені ўпраўлення ўнутраных спраў аблвыканкама, які ўручыў мне начальнік УУС аблвыканкама Мікалай Кавальчук.
Увогуле ж, самы галоўны клопат органаў мясцовага самакіравання — гэта клопат пра людзей. І тут важна ведаць кожнага чалавека: як ён жыве, што яго турбуе, у чым мае патрэбу. Значную дапамогу сельвыканкаму ў вырашэнні хвалюючых сяльчан пытанняў аказваюць старасты вёсак. Слоў падзякі заслугоўваюць старасты Іван Дарафей, Алена Шыраева, Ніна Шэпетава-Ульянава, дэпутат раённага Савета дэпутатаў Святлана Вараб’ёва.
Бягучы год у нашай краіне абвешчаны Годам малой радзімы, а гэта значыць, што мы павінны прыкласці ўсе намаганні, каб зрабіць нашы вёскі прыгожымі і камфортнымі для пражывання.