Урачысты прыём з нагоды Дня жанчын адбыўся напярэдадні свята ў Магілёўскім аблвыканкаме. Яго ўдзельніцамі сталі больш за 30 прадстаўніц цудоўнай паловы чалавецтва Прыдняпроўскага краю. 

Наш раён на мерапрыемстве прадстаўляла загадчык дзіцячага садка “Вясёлка” аг.Мышкавічы Жанна Іваніцкая (на фота — у цэнтры). У творчым калектыве да­школьнай установы яна працуе 23 гады. Мы папрасілі Жанну Анатольеўну па­дзяліцца ўражаннямі:

— Я ганаруся, што мне пашчасціла пабываць на сустрэчы такога высокага ўзроўню. Жанчын з розных куткоў Магілёўшчыны шчыра вітаў старшыня аблвыканкама Уладзімір Даманеўскі.
Уладзімір Віктаравіч падкрэсліў высокую ролю жанчыны ў грамадстве. У любым узросце, адзначыў кіраўнік рэгіёна, яна з’яўляецца для кожнага з нас надзеяй і падтрымкай. Як ні змяняецца наша жыццё, у якіх бы сферах ні працавалі жанчыны, яны заўсёды заслугоўваюць самых цёплых слоў.
Прадстаўніцы цудоўнай паловы чалавецтва, адзначыў Уладзімір Даманеўскі, дасягаюць поспехаў у любой справе. Сёння няма такой сферы, дзе б яны ні працавалі. І нездарма клопат аб жанчынах — у ліку прыярытэтных накірункаў дзяржаўнай палітыкі.
Уладзімір Даманеўскі сардэчна павіншаваў удзельніц мерапрыемства з надыходзячым святам і ўручыў ордэн Маці шасці жанчынам, якія нарадзілі і выхавалі пяцёра і больш дзяцей. Віноўніцам урачыстасцей былі ўручаны шыкоўныя букеты і падарункі. У іх гонар прагучалі музычныя кампазіцыі ў выкананні творчых калектываў і выканаўцаў.

Фото: http://mogilev-region.gov.by/