І зноў у культурным жыцці Кіраўшчыны яркай падзеяй стаў традыцыйны  конкурс прыгажосці і таленту “Міс Кіраўчанка”. На гэты раз за ганаровы тытул змагаліся 10 прэтэндэнтак, прычым адразу чатыры вучаніцы СШ №1: Анастасія Самцова, Ганна Акушэвіч, Аліна Фралова, Алёна Перадня, а таксама вучаніцы СШ №2 імя К.П.Арлоўскага Ксенія Русецкая, Мышкавіцкай СШ — Лізавета Беляшова, Баравіцкай СШ — Алена Куцая, навучэнка Жыліцкага сельгаскаледжа Расіта Маліноўская, мастацкі кіраўнік Любоніцкага СДК Анастасія Сільвястровіч, рэжысёр Цэнтра культуры і вольнага часу Дар’я Дуднік. 

Этапы конкурсу ацэньвала журы на чале са старшынёй раённага Савета дэпутатаў Галінай Слабоднікавай. А ў зале раённага Дома культуры ўдзельніц актыўна падтрымлівалі балельшчыкі — іх родныя і блізкія, сябры, выкладчыкі і проста гледачы.
Як і належыць конкурсу прыгажосці, сваё месца ў праграме заняло дэфіле: менавіта з яго пачалося знаёмства з прэтэндэнткамі на карону, і далей яны дэфіліравалі па сцэне, дэманстраваўшы дзелавы стыль, цудоўныя і непаўторныя вячэрнія сукенкі.
Але, безумоўна, больш пад­рабязна журы і гледачы маглі даведацца аб дзяўчатах з конкурснага этапа “Візітка”. Пэўныя звесткі загадзя былі атрыманы з размешчанай на сайтах райвыканкама і раённай газеты “Кіравец” міні-прэзентацыі, праводзілася онлайн-галасаванне, але рознабакова паказаць сябе ў канкурсантак была магчымасць менавіта падчас “візіткі”.
Выкарыстоўваючы розныя сродкі — фота, відэа, тэатралізаваныя эпізоды, вершаваныя радкі і прозу, танцы і музыку, удзельніцы пастараліся найбольш поўна расказаць пра сябе, свае захапленні і мары.
Сапраўдны міні-спектакль падрыхтавала разам з сябрамі Ксенія Русецкая. Яна перагорт­вала вузялкі памятных падзей жыцця пад дэманстрацыю адпаведных слайдаў: дзіцячы садок, школа, першы выхад на сцэну з вакальным нумарам, потым — у саставе ўдзельнікаў узорнай студыі юнага ма­дэльера “Жамчужына”, перамогі ў прадметных алімпіядах, конкурсах доследных работ, творчых конкурсах, моманты інтэлектуальнай гульні “Што? Дзе? Калі?” у клубе “Эрудыт”, каб адказаць сабе на пытанне “Навошта я ў гэтым свеце?” і сцвярджала, што сцэнарый свайго жыцця кожны піша сам, улічваючы парады бацькоў. “Я буду рабіць усё, каб наш свет з кожным днём станавіўся больш светлым і чыстым!” — канстатавала Ксенія напрыканцы свайго выступлення.
Анастасія Самцова прызналася падчас “візіткі”, што Кіраўшчына — самы мілы, цудоўны, яркі куток на свеце.
Захапленні дзяўчат — самыя разнастайныя: гэта танцы, маляванне, што дарэчы, некаторыя з іх паказалі на этапе “Мае таленты”, спорт, фатаграфія, нават футбол (Ганна Акушэвіч) і іншыя.
Гаворачы пра таленты, хочацца асабліва адзначыць Анастасію Сільвястровіч, якая працягвае ўражваць сваімі здольнасцямі ў жывапісу, графічным дызайне: калі праходзіў этап “Ствары свой вобраз”, яна выйшла ў такой сукенцы ўласнай “вытворчасці”, што зала проста “ахнула”! А ў папярэднім этапе прама на сцэне стварыла цудоўны мастацкі твор і паднесла журы: гэта была прыгожая, дзіўная сава.
Тэматыка Года малой радзімы была прапанавана ўдзельніцам у кулінарным конкурсе з адпаведнай назвай “Бабуліна спадчына”. А што на Беларусі можа быць такой спадчынай, як не рэцэпты страў з бульбы? Дзяўчаты рэалізавалі іх у сваіх кулінарных шэдэўрах: драніках на розны смак, бульбяных піражках з начынкай, а Маргарыта Самцова на талерцы з бульбы і зеляніны зрабіла маляўнічую кампазіцыю: вясковую хатку. На прэзентацыю страў канкурсанткі выходзілі ў нацыянальных касцюмах, гучала родная беларуская мова…
Па выніках конкурсу тытул “Міс Кіраўчанка-2018” заваявала Ксенія Русецкая, першай віцэ-Міс стала Дар’я Дуднік, другой віцэ-Міс — Лізавета Беляшова, ёй жа дастаўся Прыз сімпатый гледачоў (галасаванне па гэтай намінацыі праводзілася ў зале падчас конкурснай праграмы). Адразу ў дзвюх намінацыях была адзначана Расіта Маліноўская — “Міс Онлайн” і “Міс Артыс­тызм”, Анастасія Самцова — “Міс Зачараванне”, Ганна Акушэвіч —“Міс Грацыя”, Анастасія Сільвястровіч — “Міс Талент”, Алена Куцая — “Міс Крэатыўнасць”, Аліна Фралова — “Міс Арыгінальнасць”, Алёна Перадня — “Міс Усмешка”.
Шчырыя словы віншаванняў і пажаданняў канкурсанткам прагучалі ад старшыні райсавета дэпутатаў, старшыні журы Галіны Слабоднікавай, намесніка старшыні райвыканкама Таццяны Бяляўскай, якія павязалі дзяўчатам адпаведныя стужкі, уручылі ўзнагароды: дыпломы, падарункі, прадастаўленыя раённым аб’яднаннем прафсаюзаў, райкамам прафсаюза работнікаў АПК, раённай арганізацыяй РГА «Белая Русь», ПГУП “МарТина-
Имидж”, фірмай “Фаберлик”. “Міс Онлайн” і ўладальніца Прыза сімпатый гледачоў атрымалі сертыфікаты на падпіску на раённую газету “Кіравец” на 2-е паўгоддзе.
Трэба адзначыць, што ў састаў журы былі запрошаны старшыня Беларускай федэрацыі мадэльнага фітнесу і культурызму, прэзідэнт Еўрапейскага аддзялення Сусветнай федэрацыі фітнесу і культурызму Уладзімір Курыльчык, заснавальнік, арганізатар і каардынатар міжнародных конкурсаў спартыўных мадэляў “MODEL FITNESS INTERNATIONAL”, 4-разовая чэмпіёнка свету і 2-разовая абсалютная чэмпіёнка Еўропы па культурызму, кіраўнік ма­дэльнага дывізіёну Еўропы, дырэктар “Алімпія” атлетык-цэнтра (г.Бабруйск) Валянціна Казлоўская. А яе выхаванцы выступілі на сцэне з уражваючымі нумарамі.
Вось і завяршыўся чарговы конкурс, пакінуўшы ўспаміны, яркія эмоцыі і, магчыма, у некаторых дзяўчат мару аб удзеле ў конкурсе “Міс Кіраўчанка-2019”…
Наталля ХАДАКОВА.
Фота Максіма МІКЕШЫНА.