У дзясяты раз запар перамогу ў раённай круглагадовай Спартакіядзе школьнікаў атрымала каманда Паўлавіцкай СШ імя Р.А.Худалеева!

Завяршылася чарговая раённая круглагадовая Спартакіяда школьнікаў. Апошнім відам стала мнагаборства “Здароўе”, спаборніцтвы па ім прайшлі на базе СШ №1. Аб гэтым расказала метадыст вучэбна-метадычнага кабінета раёна Людміла Ісакава.

Рэзультаты падводзіліся ў дввюх групах, на якія былі падзелены каманды, зыходзячы з колькасці вучняў у школах. У праграму спаборніцтваў былі ўключаны стральба з пнеўматычнай вінтоўкі, скачкі ў даўжыню з месца, падцягванне на перакладзіне  (хлопчыкі), адцісканне ад падлогі (дзяўчынкі), бег на 30 м, а таксама на 1000, 1500 і 3000 м у залежнасці ад узросту.

У групе “А” перамогу атрымалі гаспадары — вучні СШ №1 (настаўнік А.С.Каранкевіч). Другое месца заняла каманда Паўлавіцкай СШ імя Р.А.Худалеева (В.І.Вароніч). Замкнулі тройку прызёраў рабяты з СШ №2 імя К.П.Арлоўскага (С.М.Садоўнікаў). У групе “Б” першае месца заваявала каманда Жыліцкай СШ (У.У.Лугін), другое і трэцяе месцы адпаведна занялі каманды Чыгірынскай (С.А.Іваніцкі) і Любоніцкай СШ (Л.П.Багданава).

Спартакіяда праходзіла на працягу ўсяго навучальнага года. Рабяты спаборнічалі ў 6 абавязковых відах і 9 па выбару. Сярод іх — мнагаборствы “Абаронца Айчыны” і “Здароўе” (летнія і зімнія), “Снежны снайпер” (у трох узроставых групах), валейбол, футбол, шахматы, шашкі, стральба, плаванне, лёгкая атлетыка, настольны тэніс. Упершыню было ўведзена выкананне нарматываў Дзяржаўнага фізкультурна-аздараўленчага комплексу Рэспублікі Беларусь. Акрамя таго, юныя спартсмены Кіраўшчыны прымалі ўдзел ва ўсіх запланаваных абласных спаборніцтвах.

Найбольш роўна і стабільна зноў выступіла дружная каманда Паўлавіцкай СШ імя Р.А.Худалеева. Набраўшы ў агульнай колькасці 1110 ачкоў, выхаванцы настаўніка фізічнай культуры і здароўя Валерыя Вароніча ў 10 раз запар (!) аказаліся пераможцамі. Другое і трэцяе месцы занялі адпаведна зборныя СШ №1 і Мышкавіцкай СШ (настаўнік А.М.Якавец).

Асобныя рабяты дабіліся поспехаў на абласным і рэспубліканскім узроўнях. Так, вучні Паўлавіцкай СШ імя Р.А.Худалеева і Мышкавіцкай СШ уваходзілі ў састаў зборнай каманды Магілёўшчыны і сталі прызёрамі рэспубліканскіх спаборніцтваў па выкананні нарматываў Дзяржаўнага фізкультурна-аздараўленчага комплексу Рэспублікі Беларусь. Вучань  Дабаснянскага ВПК ДС-СШ Кірыл Шамедзька ў ліку 10 мацнейшых юнакоў дапрызыўнога і прызыўнога ўзросаў стаў удзельнікам рэспубліканскіх спаборніцтваў па мнагаборству “Абаронца Айчыны”.

Варта адзначыць яшчэ некаторых юных спартсменаў. Па выніках спаборніцтваў у асабістым першынстве на абласных і рэспубліканскіх этапах спаборніцтваў па мнагаборстве “Абаронца Айчыны”, плаванні, лёгкай атлетыцы, выкананні нарматываў Дзяржаўнага фізкультурна-аздараўленчага комплексу Рэспублікі Беларусь, стральбе пераможцамі станавіліся Максім Няйштэтар, Антон Савіцкі, Аляксей Хархалёў, Алеся Дырыкава, Дзіяна Будніцкая з Паўлавіцкай СШ імя Р.А.Худалеева, Вольга і Кірыл Прыходзькі, Аляксандр Аляксееў з СШ №1, Аляксандр Бяляўскі з Мышкавіцкай СШ.

Кірыл Шамедзька